ORANJESTAD (AAN): Director di Stichting HUNTO, señora Dalgis Montalvo recientemente a introduci señor Marcelino Mauricio,
un miembro nobo cu a bin di Boneiro pa reinforsa e institucion kende a cuminsa traha cu e centro desde 1 di augustus.
Stichting HUNTO ta un centro cu ta brinda cuido di salud mental y adiccion cu ta accesibel pa tur hende di tur edad. Nan ta enfoca riba e necesidadnan di cada persona y ta un centro fundamental pa ataca e necesidadnan creciente di salud mental den nos comunidad, ofreciendo, tratamento y sosten pa integracion social y sosten pa cada individual y nan famia.
E echo cu ta busca profesionalnan nobo ta mustra tambe seriedad di Stichting HUNTO pa expande e servicio cu nan ya ta brindando nos pueblo. Señor Mauricio tin hopi aña di experiencia den cuido di salud mental y adiccion y sigur ta di gran balor agrega na e vision y mision di Stichting HUNTO.
Señora Montalvo a remarca cu despues di a haci renobacionnan necesario na e facilidadnan y sigui restructura e diferente programanan, nan a busca señor Mauricio pa yuda reinforsa e centro cu su experticio y structura y amplia e programanan den miho forma, y tambe yuda ‘build up’ e ekipo di Stichting HUNTO.
Stichting HUNTO actualmente tin un ekipo di 64 persona y ta purbando pa amplia e cantidad pa asina brinda miho servicio. Tin presupuesto pa esaki cu ta e necesidad di mas grandi aworaki.
