Levi Silvanie a haya e idea pa bin cu School Tour despues cu e mes a pasa den retonan mental dificil

ORANJESTAD (AAN): E artista conoci Levi Silvanie ta e persona cu a cuminza cu un idea pa yuda atende cu e problema di salud mental, usando entre otro musica.

Locual a bira e proyecto School Tour ta bay wordo treci na muchanan di scolnan secundario e luna aki y durante un conferencia di prensa Silvanie a splica con el a yega na e idea.

Segun e cantante kende a nace na Corsow y ta biba na Hulanda, e mes a pasa den un periodo dificil.

“Alrededor di 3 aña pasa mi a dicidi di kibra e silencio”.

Banda di e hecho cu for di hopi tempo hopi hende conocemi como un artista for di edad hoben, na dado momento mi tabata ‘struggle’.

Na e momento cu mi a bira adulto mi a bin conoce otro banda di medaya como tata tambe y mas o menos 3 aña pasa mi a haya mi ta atende cu un crisis den cas y esey a ‘trigger’ ami, segun Silvanie.

El a splica cu na dado momento el a haya COVID y tabata su so na cas y e momento ey tur cos cu el a primi manda abao, kier a bula sali afo.

“Tabata tin e opcion di literalmente caba cu mi bida, of haci algo pa sali for di esaki”.

Mi no a mira caba cu mi bida como un opcion cu lo bay soluciona algo, pero habri y papia tabata sinti manera algo hopi dificil riba e mundo aki como homber y como tata, segun Silvanie.

El a indica cu na dado momento el a dicidi di hinca tur e miembronan di su famia den un ‘group chat’ y el a manda un video pa expresa na nan kico e tabata ‘deal’ cune henter su bida largo.

Despues el a cuminza un trayecto di terapia y durante e proceso aki el a descubri cu apesar cu e ta biba na Hulanda y tin tur recurso na su disposicion y cu e ta canando e trayecto, el a ripara con dificil ta pa e expresa su mes papiando un idioma cu no ta su idioma natal.

“Mi a mira con facil tabata pa tin un excusa pa no pasa den e trayecto y mi a cuminza pensa riba e homber, e muher, e mama, e tata y e muchanan cu ta biba riba nos islanan, cu lo por tin tanto reto mas pa cana e trayecto di cuminza traha riba bo mes y traha riba bo salud mental”, segun e artista, kende a sigui bisa cu na e momento ey el a cuminza sinti un yamada pa comparti su storia.

E no tabata sa con pa cuminza, pero el a realiza cu e mihor manera pe tabata pa haci esaki via musica.

El a hinca su storia den un album cu cual a traha asina yama ‘listening sessions’.

Segun Silvanie musica ta tur caminda y musica por cambia nos DNA y e por transforma bo humor.

“Esey ta nifica cu si nos por introduci conocimento riba con pa uza musica, nos lo por tackle e problema di salud mental di un forma cu a wordo demostra di ta efectivo”.

E listening sessions nos a transforma den un version mas compacto pa trece na scolnan y den e ultimo añanan aki nos a logra trece e listening sessions na casnan di famia y na empresanan, den gruponan chikito y grandi y awor pa prome biaha oficialmente nos por trece esakinan pa scolnan, unda cu e intencion ta pa School Tour bira algo cu tur aña nos por trece bek, pasobra no ta 300 mucha so nos tin riba nos islanan, segun Silvanie, kende a indica cu no ta den 1 dia bo ta soluciona e problemanan.

El a splica cu banda di tres session pa mucha parti mainta di 16, 17 y 18 di October, lo tin sessionnan tambe pa adultonan parti anochi, cu ta inclui pa educadornan tambe.