Alfredo Koolman, director di WEB Aruba NV a anuncia:
* Capacidad di e planta nobo ta rond di 16 mil meter cubico pa dia
ORANJESTAD (AAN): Durante un conferencia di prensa, director di WEB Aruba NV, Ing Alfredo Koolman a indica cu pa loke ta produccion di awa di bebe, a conoce recientemente un 'biding process' pa un planta nobo di awa di bebe.
El a splica cu a resulta despues di evaluacion den un escogencia di un compania cu ta bay entrega e planta aki na WEB Aruba NV.
E siman aki ta bishitando plantanan di e compania escogi pa colecta informacion operacional y experiencia di e usuarionan na e diferente localidadnan pa asina confirma e seleccion y sigui cu negociacionnan caminda ta planea pa firma un contract na november 2023, a bisa.
Unabes cu e construccion inicia ta dura 18 luna pa tin e planta nobo operacional. Esey lo ta pa e di tres kwartaal di 2025
Segun Koolman, e capacidad di e planta nobo ta rond di 16 mil meter cubico pa dia. E expansion di e capacidad aki di awa di bebe ta suficiente pa e siguiente decada. Na mesun momento, ta construyendo un tanki nobo na Alto Vista cu un capacidad di alrededor di 18 mil meter cubico pa reemplasa e tanki bieu di 12 mil meter cubico.
E construccion ta dura te cu Augustus 2024.
E demanda den e districto mas pobla di Aruba, esta Noord, ta sigui crece y ta motibo pa expande e capacidad di e tanki aki, Alfredo Koolman a remarca.
