Legendario gran cantante Chicho Kock a fayece Diaranson marduga

ORANJESTAD (AAN): E noticia tristo a drenta Diaranson den oranan di marduga, cu e musico y cantante Roland Narcisio Kock a hala su ultimo rosea y a bay sosega.

   Ta trata aki di e conocido ‘Chicho Kock’.  El a nace na Aruba, dia 2 di september 1952. Na cuminsamento nan tabata yam’e “Chicho el feo”. Despues nan a laga “el feo” afo y a keda Chicho.

   Segun Chicho, e tin cu gradici Dios cu el a nace cu e talento ey. Si e pensa bon, practicamente su bida completo tabata un bida di artista. E kiermen semper di su bida e tabata den  musica. Tur su pan di cada dia cu e por a come, ta musica a paga p’e. Semper e tabata funciona como musico, sea den banda,  den hotel, of cu steelband. Semper su entrada ta bin di e musica cu e ta practica. E n’ tabata mucho cos, pero bo por a biba cune, bo por a paga bo debenan.

   Chicho a cuminsa toca steelband, pues su prome instrument tabata steelpan. El a cuminsa bon, como mucha chikito di diesun aña Chicho a cuminsa cu The Invaders. Colony tabata un luga masha bunita mes, na unda tabatin hopi Americano ta  biba. Nan ta toca casi tur diabierna na Rogers Beach y e luga ey ta  converti su mes den un luga masha ameno. Ey  Chicho a cuminsa, despues el a join Jumping Juwels hunto cu Ronnie Kock. Nan a  participa na hopi competencia.  Esaki ta un grupo cu a siña Chicho hopi cos. Tambe el a cuminsa como guitarista, depues el a bay riba baho  cu a keda su instrument principal.  E por toca drum, conga, cuarto, tambu, wiri, y timbal tambe.

   El a participa den Festival di Tumba na aña 1982, Chicho a wordo reconoci cu e prome cantica cu el a presenta y cu e publico a gusta, esta “E Burico”. E aña despues el a bin cu “Pal’i coco”, djey el a sigui bay  te cu el a logra bira Rey di Tumba. Prome cu el a bira Rey di Tumba, Chicho a yega di presenta cu “Gago” y nan a descualific’e! E no ta comprende te dia di awe pakico. Sinembargo, ta net “Gago” a haci Chicho mas famoso. Despues e aña siguiente Chicho a gana cu “Burachi no ta conta”. E tabata asina hopi aña den festival di  tumba, cu Chicho ta kere den su totalidad e por a participa 39 biaha, di cua 36 pa 37 biaha e tabata den e finalistanan. 

   Como profesional, Chicho a cuminsa cu Sensacion del Caribe, tocando baho y cantando coro. Chicho tabata activo cu diferente grupo musical. Como profesional Chicho tabata cu Sensacion del Caribe  pa  nuebe aña, despues el a bay toca den hotel. Despues di  hotel, el a bay Hulanda y el a toca den “Killing Ringelings”, baho, timbal y conga. Ora el a bin Aruba bek, el a join  Musical Time, hunto cu Edwin Abath. E tabata cu nan pa shete aña, hunto cu Hildward Croes (dfm). Despues el a milita den Pride, esey tabata e ultimo grupo cu e tambe a yuda lanta.

   Cu Sensacion del Caribe, Chicho a biaha hopi. Nan a yega te Colombia. Cu Pride, el a bay Venezuela den e famoso show Sabado Sensacional. Tambe el a bay Punto Fijo. E tempo ey ta Campo Shell tabata manda y nan tabata “open act” pa Fantasma del Caribe y Europa.

   Apenas dia 1 di Februari cu a pasa, na ocasion di e di 53 evento di Festival di Tumba, e organizadornan SMAC a dicidi na rindi homenahe na e gran tumbero Chicho Kock.

   President di SMAC, Darren van Ommeren a subi escenario pa asina duna elogio na e caminda di oro cu e cantante Chicho, y su nificacion pa historia di Tumba na Aruba.  Chicho a bay cuatro biaha cu e corona di Rey di Tumba.

   Chicho cu amor grandi pa musica, a pone drenta Tumba Contest desde 1976 caba, y na 1986 a dal un hit cu a keda resona tur caminda, esta ‘Burachi ‘n ta Conta’, y esey a dune e prome corona di Rey di Tumba.

   Aunke e tabata luchando contra un malesa, el a haya forza pa a subi escenario pa e homenahe aki, y ricibi un plaquette special, y cu sonrisa riba su cara por mira cu Chicho tabata orguyoso cu e Festival di Tumba a wordo dedica na dj’e.

   Chicho Kock nunca a casa, pero ta bay laga 4 yiu muher atras.  El a fayece cu 72 aña di edad. Na famia di e fayecido, na su grupo grandi di fanatico, demas musiconan, DIARIO ta extende su mas profundo palabra di condolencia.