Lecanemab ta bay forza esnan cu ta haci diagnostico di Alzheimer pa ta hopi cauteloso

Drs. Melva Croes-Yanez:

 *E tin su contraindicacionnan 

ORANJESTAD (AAN) Drs. Melva Croes-Yanez ta hopi contento cu e remedi Lecanemab a bin Aruba, pasobra e ta bay forza esnan cu ta haci diagnostico, pa ta cauteloso pa duna e remedi aki y pakico nan ta bay dun’e.

“Pakico? Pasobra e proteina Beta Amyloid, ta wordo mira como algo normal den cerebronan di hende cu tin e malesa di Alzheimer, y no ta mir’e asina lihe cu otro malesanan cu tambe ta parce Alzheimer. Dus, cu e remedi aki, bo mester haci diagnosticonan drechi; bo no por hisa benta y bisa cu ta Alzheimer, anto duna e remedi, pasobra e remedi aki tin su contra-indicacionnan”, drs. Croes-Yanez a señala.

Croes-Yanez a menciona como ehemplo di contraindicacionnan di Lecanemab, hinchamento den e cerebro, cu por causa hasta morto, si no sa kico pa haci.

“E discusionnan cu tabata tin tocante e prijs, cu ta 500 dollar pa aña, mi ta compronde nan, pasobra nan ta bisa tambe cu tur e remedinan te awo cu ami a registra pa e casonan di Alzheimer, nan efectonan ta caba despues di siete of ocho luna. E Lecanemab ta bira uno cu ta mas of menos 18 luna, y despues di esey e no ta traha mas. Pero si nan ta bisa cu nan mester haci mas investigacion. Bo mester mira enberdad tur esakinan, pasobra tur e remedinan aki merece di ta investigacion. Cada hende cu acudi na e remedi aki, ta un hende cu mester wordo notifica como un persona cu ta contribui na investigacion”, drs. Melva Croes-Yanez a remarca.

El a bisa cu mester corda bon cu e ta un remedi nobo, y tin hopi cos cu no ta conoci ainda, y locual ta hacie caro ta cu cada dos siman e pashent mester bay docter pa tuma su angua, y e mester di un team rond di dje, pa mira con e ta actua, pa check e efectonan secundario cu POR ta grave tambe.