Eduard Pieters di PPA:
ORANJESTAD (AAN): Segun Eduard Pieters di Partido PPA, e consternacion cu a surgi diahuebs santo na Centrio Deportivo Simeon Antonio no tabata necesario. Esaki ta pa falta di un maneho nacional di deporte, transparencia y eficacia di e fundacionnan cu ta cay bou di gobierno (overheidsstichtingen) y Gobierno di Aruba mes.
Si consulta e rapport di aña 2024 “Op afstand, maar toch dichtbij” di Algemene Rekenkamer van Aruba (ARA) nos por haya un bista con gobierno pa medio di e fundacionnan aki ta organisa y ta maneha entrada di Fundacion Lotto pa Deporte (FLDP). FLDP a wordo lanta na 1982 y nan metanan basicamente ta pa organisa bendemento di loteria pa por recauda fondo. Ta uza e fondonan aki den forma planifica pa yuda e.o. deporte na Aruba. Esaki den forma di maneho y mantencion di entre otro facilidadnan deportivo y centro di evenemento y recreaccion.
Sinembargo, den e rapport di ARA nos por ripara cu na 2003 e.o. FLDP a lanta un fundacion nobo, Fundacion Facilidad Deportivo (FFD) cu practicamente tin e meta pa construccion, mantencion y maneho di e facilidadnan deportivo cu ta cay bou di FLDP. Desde 2013 FLDP ta manda placa pa FFD pa cubri e gastonan di personal so, pasobra despues di 10 aña nan a dicidi pa saca e parti di mantencion afo di FLDP pero no a cambia nan statuto. E motibo pa tuma tal decision no ta mucho cla. Banda di esaki FLDP ta bisa cu nan ta propietario di e facilidadnan, pero segun e rapport di ARA no tin nada oficial entre FLDP, FFD y Gobierno di Aruba cu por demostra esaki. Banda di FFD cu tin meta similar cu FLDP, tin un otro fundacion, esta Fundacion Arubiano pa Maneho di Facilidadnan Deportivo (FAMFD) cu no ta haya subsidio for di FLDP pero tambe ta maneha facilidadnan deportivo di gobierno. Banda di e 3 fundacionnan aki di gobierno (overheidsstichting) cu tin practicamente mesun metanan tin un otro fundacion tambe. E fundacion aki cu tambe ta un (overheidsstichting) ta Stichting Sportsubsidie Aruba (SSA). E fundacion aki ta subsidia e.o. Aruba Sport Unie (ASU) y Comite Olimpico Arubano (COA). SSA tin un acuerdo di colaboracion cu FLDP. Cu otro palabra a parti FLDP den 3 fundacion cu tin nan mesun meta cu ta cubri cu un di e metanan di FLDP.
Algo cu ta mas preocupante ainda ta cu segun e rapport di ARA cu desde 2011 FLDP cu consentimento di minister di deporte y finansa di e tempo ey a entrega e operacion comercial di FLDP pa medio di un contrato na Canadian Bank Note (Aruba) (CBN(A)) cu lo vence na 2031. Segun e rapport aki, CBN(A) tabata yuda FLDP organisa e loteria desde 1999 y e tempo ey tabata cobra un “fee” di 8,25% di e entrada di benta di loteria. Cu e acuerdo nobo di 2011, CBN(A) a sigui cobra e “fee di 8.25% mas 15.25% di otro gastonan cu ta yega na un porcentahe di 23.5% di e entrada di benta di loteria. Mester bisa si cu gobierno di Aruba na 2023 a logra haci cambio den e contrato y a reduci e porcentahe bek na 8.25% cu ta cubri e “fee” so. Curioso tambe ta cu segun e rapport di ARA cu FLDP durante e periodo di 2018 y 2019 ta core cu gasto di riba 1 miyon florin na operacion.
A base di tur e inforamcionnan aki obtenibel den e rapport, PPA ta di mesun opinion cu ARA cu FLDP a perde bista y control riba su entradanan debi na decisionnan tuma door di FLDP mes y aproba pa ministernan den pasado. Ademas, pais Aruba tin poco bista si e recursonan cu FLPD cu ta wordo gasta na un manera eficiente. Esaki debi na e construccion durante tur e añanan aki, inclusivo creacion di varios fundacion.
Cu e maneho fragmenta aki den varios fundacion, un contrato lucrativo cu CBN(A) pa 12 aña, un situacion di decadencia financiero di FLDP y no obstante cu Aruba tin FLPD ainda Gobierno di Aruba ta presupuesta mas di 5 miyon extra (2018-2020) tur aña na gastonan cu supuestamente mester wordo cubri cu placa di Lotto pa Deporte y cu e relatonan financiero no ta wordo entrega anualmente (ultimo tabata na 2020) ta pone PPA preocupa severamente y ta urgi gobierno pa atende e asunto aki urgentemente pa nos hobennan y comunidad completo por haya inversion husto basa riba e placa cu FLPD ta genera. Si esaki no sosode pronto, FLDP ta core e risico di perde su permiso pa organisa loteria na Aruba y deporte ta perde e galiña cu ta pone e webo di oro.
