Lansamento oficial di Fix-it Papiamento na EPB

Erwin Lopez, Director di EPB Oranjestad:

ORANJESTAD (AAN): Scol Educacion Profesional Basico (EPB) a logra un momento historico pa enseñansa na Aruba den nos era di innovacion. EPB a introduci Fix-it Papiamento, un metodo completamente nobo, digital, interactivo y moderno den nos idioma materno, Papiamento.

  Papiamento ta e unico vak cu no tawata existi den un formato digital te awor. Segun señor Erwin Lopez, Director di EPB Oranjestad, te awor tawata uza e buki di les Cristal na Papiamento, cu ya ta hopi bieu.

  Señor Lopez a enfatisa cu, mescos cu e otro vaknan, e muchanan ta haya e metodo aki via nan laptop. Hunto cu un compania di Hulanda, a traha e plataforma digital aki for di scratch, algo cu sigur ta representa un desaroyo hopi importante pa enseñansa na Aruba. Ademas, señor Lopez a bisa cu e metodo aki por wordo uza den tur scol secundario na Aruba.

   Señor Lopez a agrega cu e intencion ta pa habri tambe opleidingnan nobo cu e meta pa crea oportunidadnan pa mas mucha cu tin dificultad cu Hulandes, pa nan por siña den Papiamento, progresa den nan educacion y eventualmente sigui pa Enseñansa pa Empleo. Asina nan por obtene mas diploma y drenta mas facil den e mercado laboral.