Arte y Talento a domina den Ban Bek Caya diabierna ultimo

ORANJESTAD (AAN): Diabierna a tuma luga Ban Bek Caya edicion Arte y Talento.

Centro di ciudad un biaha mas a yena cu bida y e biaha aki cu un caya adicional. Wilhelminastraat tambe a forma parti di e evento/iniciativa aki, caminda cu comerciantenan ta pone schouder hunto cu gobierno pa trece movecion den Caya Grandi bek.

For di tempran a cuminsa mira movecion, tiendanan cu orario adapta, diferente establecimento cu mesa y stoel pafo pa asina brinda nan servicio den un manera diferente. Ademas tabatin musica y entretenimento den tur skina, mientras cu mas y mas hende tabata yegando.

Edicion #4 di Ban Bek Caya tabata concentra riba Arte y Talento, caminda por a mira cu cada Plasa a brinda espacio na musica, declamacion y hasta debate di nos hobennan di Parlamento Hubenil.

For di comienso y riba henter e ruta por a tuma nota tambe di nos artistanan local, riba Steelpan como e Cahanan di Orgel cu a hala masha hopi hende y atencion. Hopi ta e bishitantenan cu a probecha di filma y saca potret cu nan.

Ban Bek Caya edicion 4 tabatin un surtido hopi amplio di cuminda pa tur hende y e bandanan a deleita tur presente durante di e anochi di compra. E comerciantenan a keda cu porta habri pa benta te final. Esfuerso di tur partner ta di sumo importancia pa sigui crece e iniciativa aki y ta gradici e sosten di tur cu ta forma parti di dje.