Como director di WGK na 2012:
ORANJESTAD (AAN) Parlamentario di Fraccion di Futuro, señor Gino Goeloe, den entrevista cu Matutino DIARIO a comenta (como ex-director di Wit Gele Kruis) cu el a señala e problema cu casnan di cuido pa nos grandinan, di indole priva. Desde aña 2012 el a sali afo bisando cu e casnan priva tabata lantando cabes, y el a bay den media bisa esaki y e riesgonan cu por tabatin.
“E tempo ey tabata tin dos cas di cuido so aworaki tin diescuatro, unda cu hopi hende ta trahando, ta habriendo casnan di cuido priva, y cu no ta personanan educa den enfermeria. Tambe e trato cu e grandinan tabata haya den e casnan ey no ta esun cu ami, como director di WGK e tempo ey, tabata acepta. P’esey mi a bay den media y papia e asunto aki y a papia den e caso aki cu ex-minister Alex Schwengle, ken a tuma esaki hopi na serio, y el a bin cu e Ley Zorginstelling na 2015, cu a pasa den Parlamento e tempo ey, y aworaki pa bo habri un cas priva bo mester bay DVG y na DVG tin un verklaring di vergunning, prome bo habri un cas”, Goeloe a menciona.
Mester cumpli cu varios criterio prome cu habri cas di cuido priva, manera cu mester tin enfermera cu diploma, tambe mester cumpli cu e parti di higiene, tambe cu e parti di brand, pasobra Brandweer tambe ta bin controla e casnan actual. Parlamentario Goeloe a reitera cu den e caso aki tin e Ley y e tempo di Minister Schwengle el a percura pa bin cu IVA tambe (Inspeccion di Salud Publico) pa controla e casnan aki, y no pa casnan di cuido priva so, pero tur instancia cu ta duna cuido di nos grandinan: Kiermen, Hospital, ImSan, dentista, docternan di cas, etc.
