Tambe den sector di cuido:
ORANJESTAD (AAN) Director di Wit Gele Kruis, señor Edwin Roos, a relata cu e desaroyo di e ultimo añanan, entorno e Adulto Mayor na Aruba, tin e hecho caba di tin un Directie Ouderenzaken, loke ta mustra cu tin atencion eynan.
“Anto, loke ta mas importante ta cu nos tur sa cu e medionan financiero ta scars, y mester haci bon uso di dje, eficientemente. Pues, no haci cosnan dobel. Nos como Wit Gele Kruis, semper por bisa cu nos ta traha hunto cu tur hende; nos ta comparti nos conocementonan, hasta comparti nos capacidad, si nos por yuda otro organizacion cu cierto cosnan. Pero por fabor, no ban haci cos dobel, no haci mescos cu nos, mientras cu si bo ta traha hunto bo por sirbi mas hende. Esey ta algo importante”, señor Roos a señala.
El a agrega cu mester percura, y esaki ta conta pa tur sector den nos comunidad, cu nos ta bay on mas eficientemente posible, cu e recursonan cu tin, no solamente cu recurso financiero, pero tambe cu recursonan humano.
“Pasobra nos tin, no solamente hende ta bira mas grandi di edad, pero tambe e cantidad di babies cu ta nace ta bayendo atras, kiermen nos tin menos hende cu por percura pa nos grandinan por tin nan pensioen aki 10 aña, aki 15 aña, pasobra tin menos hende cu ta bay traha, pues tin menos fondo cu ta bay drenta cerca SVb y otro parti tambe di nos comunidad”, señor Roos a señala.
El a agrega cu un problema cu tin aworaki, ta cu cada instancia tin su propio CAO. “Pues, tin hende cu ta ‘bula cura’ na modo di bisa, na moda di papia, pa un beneficio extra cu no tin akinan. Pues, algo cu nos tin ta propaganda pa hopi tempo caba y cu nos a haya mas y mas oido, hasta e sindicato ABV cu ta cerca nos tambe, tambe ta boga pa nos haya un solo CAO pa e sector di cuido. E ora ey e ta bira mas facil, pa retene bo hendenan, pasobra e beneficio ta pa tur hende den cuido. Aruba tin, asina leu cu mi sa, solamente den construccion nan tin esey. E ta traha bon, pasobra bo no ta perde hende door di competencia, solamente si nan ta haya un promocion”, Edwin Roos a señala.
El a reitera cu ta hopi importancia pa un organizacion por retene su hendenan y duna nan un bista, un carera unda nan por crece y haya mas oportunidad.
