Lama tabata spiel y por a mira sero di Santa Ana claramente na Venezuela

ORANJESTAD (AAN): E disturbio cu a presenta su mes desde siman pasa, cu a combina cu un area di presion abao den Caribe pariba di Islanan ABC, a pone cu biento di Noordoost Pasaat cu e isla ta costumbra cune, a cay drasticamente.

   Esaki a trece cune cu lama tabata hopi plat, of manera cu e ta conoci den boca di pueblo, e “lama tabata spiel-spiel”.

   Esaki te hasta tabata duna oportunidad claramente, cu bon contrast y cu bista normal, por a mira e cero di Santa Ana riba Peninsula di Paraguana na estado Falcon, Venezuela.

   Corda bon, cu e costa di Peninsula di Paraguana ta apenas 28 km pazuid di Aruba.  E sero di Santa Ana mes ta mucho mas pazuid.  Pa ta exacto, e sero di Santa Ana ta na un distancia di 68 km zuid di Zeewijk na Aruba.

   Sero di Santa Ana ta 830 meter riba nivel di lama.

   Mesun dianan ey, esnan cu a bay e punta pariba di Aruba, por a wak parti di St. Christoffelberg na hermana Isla di Curaçao tambe hopi claro.