L.G. Smith’s Steak & Chop House a lansa e coleccion di biña na glas di mas grandi

ORANJESTAD (AAN): Recientemente L.G. Smith’s Steak & Chop House, situa den Renaissance Wind Creek Aruba Resort,

a anuncia e gran noticia di e lansamento di Coravin, un sistema moderno pa preserva biña.

            Conoci como e steakhouse #1 aki na Aruba, nombra pa TripAdvisor, a sa di keda eleva nan mes y mantene e posicion aki treciendo ideanan nobo y unico pa cu e mundo di biña aki na Aruba. E bon nomber di L.G. Smith’s ta danki na nan calidad di cuminda como tambe e coleccion amplio di biña cu e steakhouse ta carga, siendo e unico restaurant actual pa ofrece mas di 120 biña den glas sirbi.

            Di acuerdo cu Heidi Michiels, Restaurant Manager y Junior Sommelier na L.G. Smith’s: “Nos a crea un experencia di cena unico cu entretenimento sin igual y na nivel di cualkier steakhouse di renombre international”. E introduccion di e ‘Coravin Wine Preservation System’ ta pone L.G. Smith’s dal un paso grandi. Ya caba tabata ofrece un seleccion amplio di biña di casnan cu renombre y reconocimento mundial, awor e coleccion ta surpasa 120 diferente biña sirbi den glas.

            E sistema di Coravin ta preserva e biña y extende e bida den e boter despues cu esaki wordo habri pa sirbi un glas, por medio di inyecta un gas den e boter cu ta permiti e restaurant of e amante di biña pa disfruta di esaki mas largo sin perde su calidad, sabor y aroma, cos cu antes no tabata posibel debi na e bida cortico di e biña y e prijs pa boter despues cu esaki wordo habri.

            Cu a sistema di Coravin por disfruta di cualkier biña variando di $14 - $58 pa glas, por bestel cualkier biña manera Caves D’Esclans ‘Whispering Angel’ of un glas di Chateau Montelena Chardonnay prome cu cambia pa un Barolo of un Bordeaux sin preocupa cu mester paga pa e boter completo, simplemente na glas.   

            Segun Paul Gielen, Gerente General di Renaissance Wind Creek Aruba Resort, “Nos mision semper tabata pa crea experencianan inolvidabel cerca tur nos establecimentonan y L.G. Smith’s semper tabata esun na cabes pa ofrece esaki na tur amantenan di bon steak, cocktails y biña. E sistema nobo di Coravin lo ofrece nos huespednan un experencia unico cu no por wordo experencia na ningun otro caminda aki na Aruba”.

            For di Coravin pa ‘Craft Cocktails’, L.G. Smith’s su ekipo ta prepara pa ofrece un experencia sin igual. E tan gusta ‘Cocktail Trolley’ cu ta trece e experencia di cocktail te na bo mesa resaltando asina e elementonan di awa, candela, tera y biento cu ta incorpora ingredientenan y sabornan natural manera entre otro e aloe local. Tur esaki pa complimenta e calidad di steaknan cu tin riba e menu como tambe seafood y otro platonan fuerte.

            E invitacion ta keda pa descubri y experencia Coravin na L.G. Smith’s.