SANTO DOMINGO: E ex-President di Republica Dominicana, esta Hipólito Mejía ta favorece pa bin cu mas impuesto riba bebidanan alcoholico y bendemento di loteria, como parti di un reforma fiscal cu Gobierno ta pensando riba dje.
E ta puntrando pueblo si nan lo ta contra pa aumenta impuesto riba rum y alcohol y tambe bendemento di loteria, unda bo ta mira un bendedor na cada skina. E ta kere cu mester castiga e sectornan cu no ta yuda den e costo di famia. El a bisa esaki na prensa.
Pero si e ex-President ta contra cu ta bay bin cu mas impuesto riba cuminda y articulonan cu ta perhudica e sectornan di menos entrada economico.
“Awor si abo ta un hende burachi y bo haya gana di hunga tur bo placa na loteria, esey no ta culpa di Gobierno, y pesey mester castiga e sectornan ey. Awor loke no por pone mas impuesto riba dje ta cuminda y cierto cosnan cu ta perhudica e hendenan di mas necesidad,” el a bisa.
Gobierno ta preparando pa bay presenta na Congreso un proyecto di ley pa reforma fiscal, sin cu nan a duna detaye di e sector riba cual nan lo aplica impuesto nobo.
