Traha caminda bunita sin corda riba esnan na pia

ORANJESTAD (AAN)- DIARIO a ricibi reaccion di algun habitante di ta biba banda di Pos Chiquito tocante e maniobra cu nan mester haci pa nan por yega Playa pa haci compras.

Segun e habitantenan cu e caminda a wordo traha masha bunita, pero no a corda riba esnan cu no tin auto y cu mester bay para banda caminda pa tuma bus of taxi pa yega e destino cu nan kier bay. Y ta eynan unda e dolor di cabez ta cuminza.

E habitantenan mester  cana bay y topa cu ceronan di santo y bloki y mester bula nan pa pasa pa asina por yega na unda e busnan ta para. E situacion ta asina peligroso ya cu e ceronan ta halto y cu bloki cu si pa descuido bo trompica bo ta haya bo ta cay riba e caminda grandi caminda autonan ta core masha duro mes.

Por a compronde cu tin persona di edad cu tin varios luna sin ta Sali for di nan cas, pa motibo di e situacion peligroso aki.

E habitantenan ta puntra pakico no traha un via accesibel pa tene cuenta cu e personanan di edad, esnan cu ta den rolstoel, ya cu pa nan ta dificil pa pasa over di e cero di tera y blokinan ey.

Nan ta spera cu instancianan concerni por bin cu un solucion pa alivia e situacion pa e habitantenan banda di e camindanan aki y pa tene cuenta tambe pa pone bushaltenan mas accesibel pa nan, ya cu nan ta na bida ainda y cu e gana di disfruta di bida te unda cu nan por.