KLM cu donacion substancial na Fundacion Mi Voz Ta Bo Voz

Danki na KLM Kids 4 Kids...

ORANJESTAD (AAN): Diamars mainta na Cafe Restaurant Yanti den Wilhelminastraat, Fundacion Mi Voz Ta Bo Voz a ricibi un donacion masha bunita mes.  Esaki ta resultado di e recien organiza KLM Kids 4 Kids Marathon, unda 50 mucha a cana 5 kilometer, y apart di esey nan a recauda fondo pa e Fundacion.

   Di su banda, KLM a dicidi na ‘match’ e suma cu e muchanan a recauda. 

   Esaki tabata e di dos aña cu nan ta organizando e evento aki.  Segun Lisette Gomes di Fundacion, e sosten brinda door di KLM ta pa yuda den cualkier proyecto cu nan por tin.

   E muchanan cu a core den KLM Kids 4 Kids Marathon, riba nan mes a recauda e bunita suma di 6.235 Florin.  Aki ta unda cu KLM tambe a match e suma aki, pues nan tambe a entrega 6.235 Florin.

   Pues e suma total a bira e ora un donacion di 12.470 Florin, cu naturalmente lo bay yuda e Fundacion masha hopi mes, cu su proyectonan.  Aki Gomes a menciona specificamente e proyectonan cu tin di haber cu prevencion di abuso sexual di muchanan na Aruba.

    Danilo de Freitas, kende ta Sales Manager di KLM pa Aruba, Bonaire y Curaçao a bisa cu nan ta hopi contento pa di dos aña di por a participa den e fundraiser di Mi Voz Ta Bo Voz, cu participacion di e muchanan di Kids 4 Kids cu a core hopi bon atrobe, aunke tabata basta calor.

   KLM ta contento di participa tambe cu Fundacion Mi Voz Ta Bo Voz, y De Freitas a indica cu e ta spera cu otro companianan tambe por contribui, como cu e tema aki ta uno hopi fastioso, hopi tristo y keto bay tin hopi tabu, pero e concientizacion ta importante y KLM lo spera cu mas lo bay yuda nan den e causa noble aki.