Diabierna tin town hall meeting riba e topico aki
ORANJESTAD (AAN): Durante un conferencia di prensa convoca Diamars mainta na sede di DVG den Caya ing. Roland Lacle, oficialmente nan a anuncia e maneho nobo di AruBIG cu lo bay drenta na vigor pa tur psicologo y enfermero tambe na Aruba.
Jurette Croes durante e conferencia di prensa, a introduci Jayburtt Dijkhoff, PhD kende ta Cabezante di Instituto di Calidad (‘Kwaliteitsinstituut’) kende a amplia riba e topico aki.
Dijkhoff a indica cu un di e tareanan di e Instituto di Calidad ta pa prepara e ley nobo cu falta pa parti di AruBIG.
AruBIG ta un ley cu ta registra y supervisa esnan den cuido di salud, y e meta di e ley aki ta dos parti: E prome parti ta pa proteha pashent y publico en general, y ta exigi cu solamente profesionalnan cu tin cierto credencial reconoci pa ley, por traha na Aruba den ramo di salud. E ta proteha e profesionalnan, esta esnan cu si ta cumpli cu e exigencianan di ley, y ta haya un titulo protehi. Nan so mag di carga e titulo ey na Aruba.
Na Augustus 2021, AruBIG a drenta na vigor pa cinco profesion, cu ta mediconan, e farmacistanan, dentistanan, fisioterapistanan, y partera. Awor e momento a yega cu tin di bay introduci esaki pa e enfermeronan y e psicologonan.
Town Hall Meeting: AruBIG lo drenta na vigor aki paar di luna pa tur psicologo y enfermero na Aruba. Ley di AruBIG ta bay exigi cu esaki sosode. E motibo ta pa garantisa cu e personanan cu ta traha den e ramo aki ta cualifica. E Ley di AruBIG lo percura pa tin suficiente profesional den ramo di salud y tambe salud mental. Ambos merece debido atencion debi na e demanda y retonan cu tin internacional y na nos pais.
E Landsbesluit cu aworaki ta den concepto lo pone riba papel cua credencialnan lo worde reconoci por ehempel for di e Paisnan manera Hulanda, Merca y Canada, entre otro. Tambe lo fiha cua specialismonan lo reconoce y cua scolnan local lo yega na remarca. Solamente esnan cu ta worde registra lo por carga e titulo di nan profesion.
Pa por garantisa cu ta tene cuenta cu mas tanto aspecto posibel, un asina yama ‘Town Hall Meeting’ ta worde yama cu tur psicologo. Motibo pa esaki ta cu mester haya tende di tur, si nan ta miembro di asociacion of no. Te aworaki no tabata obligatorio pa registra y pa e motibo ey no tur ora ta facil pa yega na tur psicologo. Esaki lo cambia cu AruBIG y p’esey ta importante pa tur psicologo na Aruba haya e presentacion y por duna feedback valioso pa cu e cambio aki conforme ley. E ‘town hall meeting’ aki lo tuma lugar riba 14 di juli pa 11 di mainta na DVG. Ta invita tur psicologo pa asisti e presentacion aki. Pa mas informacion por tuma contacto cu Instituto di Calidad Aruba na telefon 280-0231.
Pa e grupo di enfermero ta un poco diferente. E grupo aki ta hopi grandi, pa cual un invitacion lo worde manda pa un cantidad limita di representante y stakeholdersnan den salud. Na nan turno nan lo por hiba e informacion aki back na nan coleganan.
Cu e feedback aki lo por pasa riba e detayes y yega na un registro cu ta cuadra cu e necesidadnan real di Aruba y alavez garantisa un calidad halto di profesionalnan cu por traha y brinda cuido di salud.
