Pais Hulanda ta miembro di NATO y 500 dia envolvi na Ukraine
*RAFT no ta mes importante cu baca den economia y clima
*Partidonan den Gobierno ta busca hende pa dirigi nan lista
ORANJESTAD (AAN) - Kico lo pasa den mundo politico Hulandes? Cu cambionan tabata na caminda a wordo spera manera DIARIO a mustra na varios ocasion.
Sinembargo, e incertidumbre pa e futuro mas cercano di politica na Hulanda a resulta pio cu a wordo spera sigur pa loke ta trata e interes pa sigui den politica cerca diferente politico conoci.
VVD, D66 y CDA, tres partido di Gobierno ayera ainda tabata tin problema pa bisa kende lo encabesa nan lista como lider di partido ayera na momento cu nos tabata compila nos edicion di awe.
E situacion actual na Hulanda sigur mester haya atencion na Aruba, ya cu por spera cu na caminda pa eleccionnan, manera DIARIO a adverti a base di informacionnan serio, Aruba lo ta parti di discusionnan riba futuro di Hulanda pero tambe di Reino Hulandes.
Ora analisa e situacion actual na Hulanda, por conclui cu e partido nobo BBB, cu a bira ganador aplastante di eleccionnan pa Provinciale Staten algun luna pasa na Hulanda, ta e partido cu actualmente por hala rosea mas trankil, si hala rosea trankil ta posibel den mundo politico.
E tension politico na Hulanda ta remarcabel sigur si tene na consideracion cu diferente partido no por bisa ainda, kende lo dirigi nan partido.
Interesante ta, cuanto politico a mustra cu nan no tin ningun interes pa bira lider di nan partido mientras cu den cierto caso, pregunta ta wordo lansa si cierto figuranan importante den mundo politico Hulandes, lo continua den politica.
Cu VVD lo mester busca un lider nobo ta conoci for di momento cu e figura central den caida di Gobierno Hulandes, cu ta Ministro Presidente Mark Rutte, a indica cu e lo no keda dirigente di e partido.
Kende lo ta e proximo dirigente di e partido VVD, cu a produci cuatro biaha e Ministro Presidente di Hulanda den persona di Mark Rutte, ainda no ta conoci.
Si ta conoci cu e lista di personanan cu a mustra cu nan no ta interesa pa ta lider di VVD, a sigui crece.
E lider di fraccion di VVD den Tweede Kamer, Sophie Hermans a duna di conoce cu e no a interesa den asumi liderazgo di e partido.
Aparentemente den mundo politico Hulandes tin poco interes pa bira e lider di e partido VVD, cu despues cu Mark Rutte a anuncia cu e ta baha como lider, a keda cu un vacatura.
Hopi nomber ta wordo menciona manera di Klaas Dijkhoff, Edith Schippers y Jeanine Harris. Sinembargo, nan tampoco ta interesa.
E Ministro demisionario di Seguridad y Husticia, Dilan Yesilgoz, no kier a bisa ayera ainda su e ta interesa den e puesto di lider di VVD.
E persona cu si ta interesa, manera DIARIO a skirbi den su edicion di ayera, ta Andre Bosman, cu sigur lo percura pa basta dolor di cabez pa politiconan na Aruba.
Un situacion serio a surgi na Hulanda segun informantenan cu ta mustra cu e partido cu ya ta canta victora ta e BoerenBurgerBeweging, BBB, cu a bira e partido mas grandi y di mas interes na Hulanda.
Si no surgi ningun sorpresa, BBB lo for e Gobierno nobo di Hulanda.
Na Aruba, ayera vacacion di Parlamento a haya su inicio. Sinembargo, e Miembronan di Parlamento di Aruba, mester keda atento pa loke por pasa na Hulanda cualkier momento.
Informantenan ta sigui indica, cu relacion entre Reino y su teritorionan den Caribe lo keda na discusion durante e eleccionnan aki cu lo produci pa politiconan Hulandes un pakete pisa.
Cambio di clima y e forma cu e ta afecta economia y bida social Hulandes, sigur ta importante.
Guera di Ukraine ya a cumpli 500 dia como parti di e encargo total di Hulanda, cu como pais no solamente ta miembro di Reino Hulandes pero tambe parti di Union Europeo, NATO y asina envolvi den e Guera di Ukraine cu ya a cumpli 500 dia di existencia.
E posicion di Euro mester wordo vigila hunto cu e pakete total di medidanan cu cambio di clima ta exigi.
Cu un pakete pisa di problema den man, politiconan Hulandes mester sigui dialoga cu Aruba. Manera informantenan clave a mustra pa e Pueblo Hulandes, RAFT of LAFT no tin e mes importancia cu baca den e cambio di clima y e forma cu e medidanan lo afecta e sectornan mas importante di economia Hulandes.
BBB ta den un posicion unico na Hulanda y e posicion aki ta inclui, cu BBB nunca a negocia cu Aruba y tin tur caminda habri pa wordo encarga cu maneho di Hulanda cu ta den un situacion sumamente dificil.
Politiconan di Aruba mester keda wowo habri aunke nan a bay cu vacacion, pasobra na November, Hulanda ta bay urna electoral.
