Kabel submarino CELIA conectando Caribe cu Merca

ORANJESTAD (AAN):  Miembronan di e consortium di CELIA ta introduci CELIA,

un ‘express’ kabel nobo di capacidad halto den e region di Caribe cu ta conecta Aruba, Martinique, Antigua, Puerto Rico y Boca Raton na Florida.

            E kabel nobo cu ta uza lo ultimo den tecnologia di Fiber Optics, conoci como CELIA, Caribbean ELIte Alliance, lo extende pa mas di 3.700 km, uniendo puntonan clave den Caribe cu Merca, presentando un minimo di 8 paar di Fiber, ofreciendo un minimo di 22 Terabit pa seconde (Tbps) pa cada paar di Fiber, y un capacidad inicial aproximadamente di mas di 170 Tbps. CELIA lo bay den funcionamento e di tres semester di 2027.

            E miembronan di e consortium di CELIA ta SETAR como e landing partner na Aruba, Orange como e landing partner na Martinique, Telxius como e landing partner na Puerto Rico y Boca Raton y APUA como e landing partner na Antigua.

            Alcatel Submarine Networks a wordo selecciona como e end-to-end supplier di e infrastructura di e kabel submarino, conectando CELIA entre tur landing partners. E contract ya ta na vigor incluyendo opcionnan pa aumenta capacidad y agrega landing points nobo.

            CELIA lo mehora e conectividad den e region di Caribe, ofreciendo transferencia di data sigur y di capacidad halto y speednan di Internet hopi halto cu low latency cu ta sostene e demanda digital creciente den e region riba e ruta strategico aki ofreciendo un calidad halto di servicio.

Ademas, inversionnan manera CELIA ta garantisa cu e islanan ta conecta na  worldwide data networks. Conexion global ta crea oportunidadnan pa crecemento economico sostenibel, reduccion di e digital divide y mehoracion di e resilencia di e network.

            E proyecto di CELIA lo incorpora standardnan halto di proteccion di medio ambiente y preservacion di e biodiversidad den ambos teritorionan terrestre y marino den cada etapa di e proyecto. E seleccion di e ruta y e diferente infrastructuranan a wordo studia cuidadosamente pa evita areanan mas sensibel y aplica tecnologianan menos invasivo.

            Como nos compania nacional di telecomunicacion, SETAR ta orguyoso di forma parti di e proyecto di CELIA cu ta garantisa conexion pa e futuro generacion. “Pa un isla manera Aruba, e ta crucial pa nos ta conecta na data networks internacional pa atrae inversionnan priva, stimula companianan local, educacion, servicionan esencial, e sector di hospitalidad y pa nos integracion den e economia mundial.” – Roland Croes, CEO di SETAR.

            “E proyecto di CELIA ta respresenta un avance significativo den conectividad y lo mehora e resiliencia di e network den e region di Caribe. Door di uza lo ultimo den tecnologia di Fiber Optics, nos por ofrece speednan di Internet hopi halto y sigura capacidad di transferencia di data mientras cu ta cumpli cu e standardnan estricto di medio ambiente. E proyecto aki lo contribui grandemente na e crecemento economico sostenibel local y conexionnan na otro teritorionan ta ser studia. Tambe nos ta orguyoso cu nos subsidiario Orange Marine lo ta encarga cu e marine deployment di e kabel.” – Samir Benzahra, Director di Orange Antilles Guyane.

            “CELIA ta un otro stap grandi den e expansion di e red global di Telxius, aumentando capacidad y agregando mas ruta ‘redundant’ den ful America. Nos ta comprometi pa ofrece e latency di mas abou y e redimento di conectividad mas halto pa nos clientenan comercial den Caribe y mehora e experiencia pa nos usuarionan na nivel mundial.” – Mario Martin, CEO di Telxius.

            “E proyecto aki ta un paso grandi di adelanto den e proceso di recreacion di e digital environment di Antigua y Barbuda. E ta demostra e compromiso continuo di APUA pa brinda e miho solucionnan di conectividad cu lo ta vital pa e crecemento economico di e pais, sostene companianan, transforma comunidadnan y pone Antigua y Barbuda como un pionero den transformacion digital den OECS.” – John Bradshaw, General Manager di APUA.

            Paul Gaba, VP Marketing & Sales di ASN ta refleha riba e contribucion di CELIA na e conectividad den Caribe: “Nos kier a gradici e consortium di CELIA pa pone nan confiansa den ASN pa deliver lo ultimo den generacion di conectividad submarino di capacidad halto den Caribe pa Florida, probechando di nos experiencia amplio den e region pa deliver un architectura cu ta crea un plataforma confiabel y sigur pa crecemento sostenibel den un region cu ta exponi na horcan y otro desafionan natural.”