Dahariana Evertsz, Hefe Promocion Salud na DVG
ORANJESTAD (AAN) Señora Dahariana Evertsz, Hefe di Departamento di Promocion di Salud, den entrevista cu DIARIO tocante e conferencia “Sex Worker’s Health & Safety na Aruba”, a bisa cu e dia aki tabata pa trece concientizacion riba e aspecto di salud y seguridad di e damanan di compania.
E ta haya algo tremendo cu DVG y Universidad di Aruba a colabora den e estudio cu a wordo haci dedica na e damanan aki, y wak kico ta e partinan di ley cu ta wordo enfoca na kico ta e servicio cu nan ta duna, y con por preveni cierto riesgonan pa salud publico, den e trabao cu nan ta eherce.
“Nos ta contento cu nos por a colabora cu diferente organizacion di cual tres di nan a presenta y un tremendo estudio a wordo haci den colaboracion cu “Dienst Besmettelijke Ziekten” (DBZ). Tambe a haci entrevista cu DIMAS, KPA y cu e damanan di compania mes”, señora Evertsz a comenta.
El a bisa cu tambe tabata importante e parti di comunicacion cu ta wordo eherce entre e ciclonan aki, y kico ta e servicionan cu ta wordo ofreci pa nan na Aruba. Ki leynan esaki ta encera, ki parti di seguridad mester tene na cuenta, e parti di nan salud si nan ta eherce e trabao aki na un manera corecto”, Evertsza relata.
Kiermen si nan ta uzando proteccion, si nan ta vacuna, si nan ta haci nan mesun testnan tambe, pasobra nan servicio ta wordo duna na un grupo un tiki grandi, aki na Aruba.
“Pero nos kier pa wordo haci tambe na un manera sano pa no perhudica nos comunidad di ningun manera, y tampoco nan mes. Un di e organizacionnan ta SNAA, cu ta parti di prevencion di traficacion di hende tambe nos ta enfoca riba dje. Pues, nos como Departamento di Salud Publico ta hopi contento cu nos por a enfoca riba e aspecto aki, anto haci nos trabao na un manera corecto”, Dahariana Evertsz a señala.
