Joran a revela e manera hororoso con el a mata Natalee Holloway

Mama di Natalee contento cu despues di 18 aña caso por wordo considera resolvi

 *E 20 añanan cu Van der Sloot lo haya ta pa caso di extorsion

*Hopi ta cuestiona con por ta cu e curpa no a wordo haya  

ORANJESTAD (AAN): Manera a wordo publica den DIARIO y diferente caminda rond mundo, despues di 18 aña Joran van der Sloot oficialmente a confesa cu el a asesina Natalee Holloway, ora cu nan tabata riba beach hunto y e mucha muher Mericano a nenga di tene relacion sexual cu ne.

            Na prome instancia no tabata conoci exactamente con e Hulandes a mata Natalee, pero despues cu e caso di extorsion contra Joran na Alabama a termina, mas detaye di e confesion a bira conoci.

            Joran a indica cu ora cu Natalee a dal e cu rudia na su parti priva, el a rabia y a scop e hoben na su cara asina fuerte, cu el a bay for di tino of te hasta tabata morto caba.

            E Hulandes a sigui bisa cu el a wak un bloki grandi riba santo y el a coy esaki y dal e na cabez di Natalee.

            El a splica cu ora cu el a dal e Mericano cu e bloki, apesar cu tabata anochi el a wak claramente con e cara di Natalee a wordo placha.

            Joran a splica cu despues di esaki el a coy e curpa y lastr'e pa hib'e den awa. El a drenta awa te ora cu e awa a yega te na su rudianan y el a laga e curpa bay den awa. Despues di esaki el a cana bay cas.

            E mama di Natalee tabata presente na corte Diaranzon y el a haya un chens pa dirigi su mes na Joran. Den prensa Beth Holloway a trece dilanti cu el a bisa Joran den corte algo cu semper e kier a bise, esta cu e ta un asesino.

            E mama di Natalee a indica cu e ta contento cu porfin despues di 18 aña e caso aki por wordo considera resolvi, apesar di e hecho cu e 20 añanan di castigo cu Joran ta bay haya relaciona cu e caso di extorsion, ta bay core hunto cu e castigo cu e ta sintando den prison di Peru pa asesinato di Stephany Flores na 2010.

            Despues cu Joran a confesa, dimes hopi hende ta cuestiona si e biaha aki si e ta papiando e berdad, apesar di e hecho cu segun FBI, e 'lie detector test' cu Joran a haci ta indica cu e ta papiando e berdad.

            Hopi ta cuestiona con por ta cu e curpa di e Mericano no a wordo haya, si Joran a bent'e den laman eynan mes na Fisherman’s Hut. Tambe ta haya straño cu no a topa cu e bloki ey na beach cu mester tabata tin sanger riba dje, ora cu na 2005 a haci un investigacion extenso den e area.