Jongerenraad ta parti importante di Telefon pa Hubentud

ORANJESTAD(AAN): Diaranzon durante un conferencia di prensa di Fundacion Telefon Pa Hubentud, den cual a anuncia cu ta buscando miembronan nobo pa nan Jongerenraad,

social worker di e fundacion Sherman Milliard a bisa cu e ta contento cu comunidad ta duna hopi atencion na proyectonan di Telefon pa Hubentud.

“Pesey pa nos e buskeda pa miembronan nobo pa nos Jongerenraad ta asina importante, pasobra nos ta un fundacion pa hobennan y di hobennan”.

Pa e motibo aki nos ta acerca tur hoben na Aruba cu kier participa, pa laga nan sa cu nos ta wardando riba tur nan videonan di arte, poesia, etc cu nan manda aden, pa despues nos por scoge e dos hobennan cu ta bay bira e miembronan nobo di e Jongerenraad, segun Milliard.

E social worker di Telefon pa Hubentud a desea tur hoben un exito cu e aña escolar nobo cu ta bay cuminza pronto.

“Tambe nos kier laga sa na e adultonan, maestronan etc., cu nos tey tambe pa ofrece charla y workshops totalmente gratis, mescos cu nos ta haciendo pa 21 aña caba”, segun Milliard.

El a indica cu e fundacion ta traha na un manera preventivo, pasobra ta hopi importante pa purba preveni, prome cu algo malo sosode.

“Nos kier enfatiza cu e linea 131 di Telefon pa Hubentud ta habri y disponibel semper, mientras cu nos ta dispuesto pa sigui duna workshops y proyectonan grandi tambe”, segun Milliard, kende a indica cu e ta spera di sigui haya apoyo for di tur e profesionalnan pa sigui duna e bon servicio na e hobennan di entre 8 y 24 aña.