Grupo di 22 persona siguiendo curso na Guardacosta pa bira Buitengewone Agent van Politie

ORANJESTAD (AAN): Dialuna cu a pasa, e asina yama lesnan di Basis Opleiding Kustwacht (BOK) 2021 a cuminza. 

E programa BOK ta encera les cu lo dura un aña, consistiendo di modulonan practico y teoretico cu ta inclui lesnan pa oficialnan converti nan mes den Buitengewone Agent van Politie (BAVPOL).

   Pa e aña aki, Guardacosta di Caribe Hulandes a haya 22 aspirante di Aruba, Curacao, y St. Maarten.  Cada uno tin e ambicion pa como guardacosta nan yuda nan pais y proteha esaki.

   Desde Dialuna, e hobennan a cuminza cu e periodo di introduccion, e periodo di ‘SamenSterk’ unda cu nan ta bay pasa den pruebanan di tanto fisico y mental.

   E lesnan ta cuminza pa e aspirantnan cu un presentacion di e instructornan y check un prueba fisico di referencia, den cual e instructor ta traha un plan di training pa e aspirante.  E meta di e periodo ‘SamenSterk’ ta cu e aspirante ey ta crece den e periodo ey tanto fisico- y mentalmente, y ta conoce di cerca cu e organizacion di Guardacosta di Caribe Hulandes.

   Di e aña aki en adelante, e training ta ser haci na Marinekazerne Suffisant na Curacao cu ta un berdadero campo di training.  E kazerne aki a wordo mihor equipa pa haci cursonan intenso asina.

  Di awor caba, tanto DIARIO como tambe Guardacosta ta desea e 22 aspirantenan hopi exito den e aña nan dilanti.