ORANJESTAD (AAN): E siman aki management di Arubahuis a tuma nota di un encuesta via “docs.google.com” cu a worde manda via entre otro WhatsApp pa diferente Arubiano residencia na Hulanda.
Den e encuesta aki ta pidi pa duna opinion riba diferente aspecto cu tin di haber cu e operacion di Arubahuis.
Pesey mes, Management di Arubahuis ta desea na enfatisa cu ni Arubahuis directamente, ni Gobierno di Aruba indirectamente, no a duna instruccion alguno pa tene un encuesta. Por lo tanto Gobierno di Aruba no ta na altura kende of cual organizacion por ta tras di e encuesta aki, tampoco no ta na altura cu ki meta e informacion aki ta worde pidi y mucho menos kico lo worde haci cu e informacion duna.
Ademas Management di Arubahuis ta probecha na remarca cu na final di e encuesta tin un disclaimer di Google.com cu ta bisa claramente cu e contenido di e encuesta no ta traha door di Google y tampoco no tin aprobacion di Google.
Mirando e indole di e encuesta y teniendo na cuenta cu e leynan di privacidad vigente na Europa, ta haci un yamada general pa ta hopi cauteloso na yena un encuesta asina. Arubahuis ta enfatisa cu no sa cu ki meta e informacionnan aki ta worde pidi y con lo anda cu e data colecta durante e encuesta.
Covid-19 a trece cune cu hende muy en especial den Paisnan grandi ta mas dependiente di plataformanan social cu e periodo prome cu e pandemia. Tin gruponan haciendo masha mal uso di e situacion y e fenomeno di “Phishing” ta un problema creciente. Management di Arubahuis ta mire como su responsabilidad pa informa y concientisa e comunidad Arubano di e peligro di “Phishing” por lo tanto ta cumpli na informa di e gravedad di e encuesta aki y productonan similar cu porta den prome instante ta mustra como algo inofensivo.
E potret aki ta di Arubahuis y ta pa cortesia di Cas di Aruba.
