Johan van Meeteren tabata e prome persona cu a logra cende luz electrico

Celebrando 75 aña di Elmar

ORANJESTAD (AAN): Na aña 1923, despues di prome guera mundial, Sr. Johan van Meeteren, doño di e planta Aruba Gold Company na Balashi, a introduci e prome generator comercial na Aruba, y asina tabata e prome persona cu a logra cende luz electrico riba nos isla.

-1924: Sr. Van Meeteren a presenta e generator y e prome luz na Gezaghebber Isaac Wagemaker, y a yega na un acuerdo pa inicia distribucion di coriente na Aruba. Door di establece suministro di coriente den Oranjestad, Sr. Van Meeteren a contribui den desaroyo di nos capital.

-1930: Sr. John G. Eman a tuma over e negoshi, bou di un acuerdo cu Sr. Van Meeteren lo keda como hefe tecnico. Electra N.V. a yuda impulsa e desaroyo di industria di petroleo na Aruba door di amplia e red electrico pa garantisa suministro di coriente den San Nicolas.

-1940: Electra N.V. a contribui na e esfuersonan pa proteha Aruba durante segundo guera mundial, door di haci un gran inversion pa suministra electricidad pa e operacionnan militar di e aliadonan riba isla.

-9 di november 1950: E concesion como proveedor di coriente na Aruba a wordo traspasa for di Electra N.V. pa OGEM N.V. (Overseas Gas and Electricity Company) di Hulanda.

-15 november 1950: Pa 12'or di marduga riba 15 di November 1950, N.V. ELMAR a bira oficialmente e proveedor di coriente na Aruba. For di e momento ey, N.V. ELMAR tabata produci, transmiti y distribui coriente pa Aruba.