Por a nota hopi atencion pa restauracion di scol Reina Beatrix

ORANJESTAD (AAN): E trabaonan rond di restauracion di e scol monumental Reina Beatrix a hayando hopi interes.

Dia 3 di november a cuminsa oficialmente e proceso di destaho publico. Dia 11 di november a tuma luga e sesion informativo pa contratista, unda empresanan interesa a ricibi un splicacion di e proyecto, por a haci pregunta y tambe a haya un tour den e edificio di e scol.

   Gobierno a sali desde prome dia "trot den bom".  Apenas tres dia cu Gabinete AVP-FUTURO a forma e gobierno nobo dia 28 di maart, Minister-President Mike Eman a para dia 31 di maart den porta di Reina Beatrix School, hunto cu ekipo di Serlimar y DOW, pa deshaci di un cantidad di desperdicio y stof cu cu a tuma e edificio over. Durante e esfuerso conhunto aki, tres minister, Prome Minister Mike Eman, Minister di Relacion di Asunto di Reino Gerlien Croes y Minister di Finansa Geoffrey Wever, tur ex-alumnonan di e Reina Beatrix School, a declara cu e restauracion di e monumento nacional aki ta un prioridad absoluto pa nan.

   For di e dia ey, Prome Minister Mike Eman y Minister di Enseñansa Gerlien Croes a tuma e proyecto cu gran determinacion. Un edificio abandona di NNT na Julianaschool a mira e prome trabao di restauracion pa sirbi como Planning Bureau. Den e edificio aki, situa dilanti di Reina Beatrix School, arkitecto Daphne Every cu su team a traha den  un tempo acelera riba e plan, preparacion y planificacion cu a yega awo na e proceso di destaho aki.

   Hopi interes for di e sector: E interes entre e contratistanan ta grandi. Pa e parti di electra tin 8 empresa cu a registra, pa instalacion di airconditioning 7 empresa, y pa traboanan di construccion tambe 7 empresa. E empresanan awo ta preparando nan calculacionnan y mester entrega tur nan prijsnan mas tarda dia 10 di december.

   E proyecto ta inclui restauracion di partinan di e edificio cu a door di añanan a cambia, cu e meta pa trece Reina Beatrix School back na su estado original. Alavez, lo ekipa e edificio completamente cu e instalacion di mas moderno riba tereno di instalacion electrico, siguridad y airconditioning. Despues cu e trabao ta completa, e edificio lo ta tanto historicamente autentico como prepara pa futuro.

   Sostenibilidad den centro: Reina Beatrix School completamente renoba lo ta un ehempel di construccion sostenibel na Aruba: (*) Lo colecta e awa di condensacion di tur airco y uza esaki pa flush e toiletnan. (*) Lo uza awa di yobida y condensacion pa muha e matanan nobo den e patio, pa crea sombra y frescura. (*) E edificio lo haya panel solar pa compensa un gran parti di su consumo di energia.

   Reina Beatrix School, construi na 1950 como un expansion di scol Juliana y desde 1953 cu su nomber actual, ta e unico monumento protehi na Aruba cu a diseña como un scol y cu ainda tin e mes funcion. Danki na e hecho cu a haci relativamente poco cambio den pasado, e restauracion por enfoca riba e diseño original, algo no comun den nos herencia.

   Arkitecto Daphne Every ta indica cu “Herencia ta e sostenibel nobo”.  E ta lider di proyecto y arkitecto principal, y el a enfatisa e importancia di e metodo aki. 

 “Den e tempo aki ta mas importante cu nunca pa proteha nos herencia — no solamente pa nos cultura y identidad, pero tambe pa sostenibilidad berdadero. No tin nada mas sostenibel cu restaura un edificio historico y mesora ekipa esaki cu instalacionnan moderno y sostenibel,” arkitecto Every a indica.