Alumno Rene de Graaf a siña hopi di planta mata na SPO Santa Cruz

SPO Santa Cruz ta sembra speranza

ORANJESTAD (AAN): Proyectonan manera e proyecto di Hofi Pal’i Siya Cora di SPO Santa Cruz ta proyectonan hopi valioso pa e futuro existencia di e sector di agricultura na Aruba.

   Studiante di SPO Santa Cruz, Rene de Graaf ta conta di su experencia cu el a haya den e programa aki na unda nan ta siña muha mata eficientemente, pero tambe con ta stek mata y mantene esakinan pa por produci y crece saludabel. Ademas nan ta siña prepara e tera segun e necesidad di cada sorto di mata pa nan por produci bon. E conocemento cu de Graaf a haya formando parti di e programa aki, Rene ta uza na cas yudando su tata cu plantacion.

   Den sector di agricultura, pa Rene ta existi un conexion cu e matanan, tin biaha e ta papia cu su matanan, e ta relaha y alegra su dia. Rene ta consciente cu a kita hopi mata tur rond di Aruba pa desaroyo y ta lamenta esaki, pero ta contento cu Prome Minister Mike Eman a inicia cu e plan nacional di reforestacion cu lo mester trece e balansa back den nos naturalesa. Na mes momento e plan di reforestacion ta crea conscientisacion den comunidad riba e importancia di planta mata y cuida e matanan existente y ta yuda aumenta e interes den agricultura y flora.