Jessica Ras ta satisfecho y orguyoso cu grupo di Formacion Social a logra

ORANJESTAD (AAN): Den entrevista cu DIARIO, Jessica Ras, ken ta dirigi e Proyecto Formacion Social (Social Vorming Traject), a expresa cu pa SVT, aña 2021 ta un aña hopi bunita.

Y dia 18 ultimo, tabata un dia no bunita so, pero hopi special, unda e grupo di hoben a termina e prome parti di nan prome parti di e trayecto.

  Un grupo cu a cuminza na Maart ultimo cu 14 hoben, y e ta sinti su mes hopi orguyoso di e team di STV. “Pasobra no solamente e hobennan a logra, pero Aruba a logra y nos tambe a logra awe, cu despues di cuater luna e hobennan a finaliza e prome parti di e proyecto y otro siman nan lo haya nan certificado oficial na e grupo, y ta sigui pa e di dos parti cu ta coremento di stage”, Jessi Ras a expresa. El a reitera cu e ta sinti hopi orguyoso di e hobennan aki y e ta sigur cu nan famia tambe ta hopi orguyoso. El a gradici henter e team di SVT cu a traha cu hopi amor y pasenshi cu e hobennan aki.

   SELECCION GRUPO FEMENINO:  Pa loke ta trata e grupo femenino tin hopi inscripcion y nan ta bezig cu e parti di seleccion, y nan ta wardando riba un par di informacion ainda, cu nan mester di e actividadnan di seleccion. “Mi tin cu bisa cu el a bay sumamente bon. Pa e prome grupo di mucha muher, e interes tabata hopi grandi. Tabata tin oficialmente, 30 inscripcion y for di nan tin mas of menos 20 pa 22 pa bay den e seleccion. E grupo no ta bay ta grandi. Si tur cos ta bay bon nos ta bay cuminza cu 15 mucha muher, y den e trayecto di e simannan cu ta bay bin, nos ta bay scoge ken ta bay cuminza cu e trayecto y ken lo bay riba lista di spera”, Jessica Ras a duna di conoce.