E Brug di un cas sin balor Madushi ta horta pan for di boca di pobernan na Aruba - Pakico un brug di 600 Mil pa un ruina y tereno pa Tesorero di partido MAS Lelicia Tromp - Presidente Marisol como Minister a paga Secretario Wernet cantidad di overtime di Gobierno
ORANJESTAD(AAN)— Si Aruba kier recuperacion den futuro, fiesta cu placa y propiedad di Pueblo mester caba tur caminda. Reglanan mester wordo sigui pa asina gruponan politicamente privilegia di un of otro forma, sigur no haya caminda pa cana.
Pa analisa tur informacion oficial cu nos ricibi, DIARIO ta pone documentonan den cuadro di e leynan cu ta dicidi pa nos pais.
Leynan di Aruba ta proteha bienestar general cu mester sirbi henter Pueblo na tur forma.
Awe pa analisa loke ta pasa cu Marisol Lopez Tromp, atrobe ta crea un caos politico na Aruba, cu na 2020 den pandemia a wordo paralisa pasobra Marisol kier a keda Ministro.
Aruba no por comprende nada di loke Marisol ta predica, pasobra Marisol ta habil cu su palabranan cu cual el a pone un Parlamento tril.
DIARIO ta splica Marisol cu DIARIO no mester di ningun Ministro ni otro politico pa bisa DIARIO kico Ley ta exigi di gobernacion y di gastamento di placa.
Nos tin mas cu capacidad basico pa huzga kico ta pasa aki cu placa di Pueblo cu for di momento cu Marisol a sinta riba trono politico a bira discutibel.
Kico DIARIO a expone awe cu prueba, cu como matutino responsabel DIARIO mester presenta?
Pa cuminsa nos ta bay na e momento cu Marisol Lopez Tromp como Ministro di Aruba pero tambe como un profesional cu mester conoce y reconoce situacion social di un pais, a dicidi di spart placa di pagadonan di belasting di Aruba pa traha un brug costoso pa e cas di su Madushi na Aruba.
For di momento cu esaki a sosode e tempo, DIARIO a protesta. Kico lo pasa si pa cada cas na Aruba cu tin un rooi su dilanti, Gobierno construi un brug, cu Gobierno mester mantene?
Solamente e cas di Madushi a wordo sirbi cu e brug di 600 Mil Florin. Cuanto Arubiano por a traha un cas chikito cu e placa aki? Cuanto Arubiano por a come? Cuanto mucha por a haya yudansa pa nan buki di school? Cuanto uzo Aruba tabata tin pa e placa aki?
Segun e Ley di Aruba cu ta dicidi con ta gasta placa, e gasto mester honra un proposito nacional of di un grupo of motibo importante.
No por hustifica 600 Mil pa un brug costoso manera por mira riba e portret aki pa e cas di Madushi cu sigur tin un balor como cas, cu no ta yega cerca di e balor di e brug.
Obviamente riba e tereno, cu segun cierto documentonan a wordo duna di 2005 pa 2065 na erfpacht tempo di Marisol como Ministro, no tin na cas ni otro asunto cu por compara cu e gasto di e brug, cu ta bira legalmente dudoso si nos tene cuenta cu e leynan.
Mas ainda por mira con e cas ta basha abou pero Pueblo mester sigui mantene e brug costoso. Nos ta invita pa mira e portret bon pa mira e calidad di construccion.
Kico tin e balor? E tereno! Ta asunto di tereno a bira importante na momento cu Marisol Lopez Tromp a bira Ministro di POR te na e momento cu su partido a pidi pa e baha. Pakico un Partido lo pidi pa un Ministro cu ta produci voto bay?
DIARIO lo bolbe pa e show den Parlamento pero Marisol ta cuminsa splica cuanto mantencion di e brug pa hende yega un cas cu no ta existi mas, ta costa.
Nos ta sigui. Kico ta e destinacion di futuro di e tereno, cu a recobra balor pa motibo di e brug? Pues herederonan di madushi di Marisol of personanan cu por a cumpra e tereno mientrastanto, a wordo beneficia cu e 600 Mil Florin di Pueblo, cu segun ley tin tur derecho pa uza DIARIO, uza tur metodo pa mira kico ta pasa cu nan placa.
For di momento cu e partido MAS a lanta tin mas motibo pa Pueblo ta alerta. Presidente di MAS ta Marisol cu pues a percura pa Lelicia keda cla cu su tereno den tempo record. Lelicia ta Tesorero di MAS. Secretario di MAS ta Alehandro Wernet, cu Marisol a paga hopi placa na overtime como coordinador di Marisol.
Con Marisol, a base di tur loke nos a trece dilanti, por critica “family and friends” si politiconan di partido MAS ta family and friends di Marisol.
DIARIO a base di reglanan di ley lo sigui haci su trabou y ta exigi pa Pueblo haya tur informacion di un situacion dudoso cu ta existi na e Cas di Madushi cu placa di Pueblo a duna mas balor. Na mes momento mester bini un contesta pa e placa cu Wernet ta gana na overtime.
