Manera ya DIARIO a publica pakete di AZV tambe lo pasa pa proximo Gobierno - Tur informacion ta indica cu proyectonan ta bini como sosten pa economia - Gobierno Wever-Croes lo kier evita un panorama politico pa decision pa futuro
ORANJESTAD(AAN)- Algun siman pasa DIARIO a informa Aruba, cu segun fuentenan internacional e dos proyectonan grandi pa rebiba e economia di Aruba cu ta Eagle y Quanten, ta sigui y den futuro manera actualmente tur cos ta indica lo establece nan mes na Aruba.
Informantenan cu DIARIO tin actualmente den exterior, ta hasta trece dilanti cu pa Eagle sigur establecemento na Aruba ta di sumo importancia sigur a base di e tur e combersacionnan cu a hiba na Aruba.
Na cierto momento tabata tin indicacion, manera DIARIO a raporta, di intentonan pa tranca e proyectonan pero aparentemente negociacionnan a continua.
E pregunta grandi na Aruba ta pakico prome cu cambio di Gobierno, no a firma un acuerdo final cu e companianan.
Informacionnan cu DIARIO tin di Merca ta mustra cu den seno di Eagle LNG ya nan ta tene cuenta cu acuerdonan cu nan a firma anteriormente y cu awor a permiti nan prepara nan mes pa na momento cu tur cos ta regla, haci nan entrada na Aruba cu ta bira centro di distribucion di nan producto, cu ta gas natural.
Pa loke ta trata Quanten tambe, e compania cu ta basa riba un grupo empresarial pues consorcio, tin tur intencion pa sigui cu su proyecto pa Aruba.
Informantenan internacional a indica cu ta di Aruba mes ta nota inclinacion pa no firma den un ambiente cu sabor politico pero pa spera te ora eleccion pasa pa finalisa e negociacionnan, cu segun informacion ta practicamente finalisa.
Informacionnan na Aruba ta mustra cu Gobierno di Aruba ta considera cu Gobierno ta continuidad y cu mas importante cu politica ta, e garantia cu Aruba ta bon sirbi cu e proyectonan cu a atrae.
Esaki ta motibo cu aparentemente gestionnan ta wordo haci pa e proyectonan wordo termina durante e proximo gobernacion pa kita tur aspecto politico for di loke ta esencial pa futuro di Aruba.
E gobierno nobo di Aruba pues lo hereda finalisacion di e negociacionnan y e realisacion di e proyectonan mientras tambe tin otro asuntonan manera e AZV cu mester sigui atende cu Hulanda pero tambe cu gruponan local pa asina sigura cu e decisionnan cu ta tuma no ta mara na sabor politico pero na interes di Aruba.
