Jairo Maduro y Tyson Croes ganador di Prins y Pancho Adulto

ORANJESTAD (AAN): Rondona di ambiente den Centro di Bario Dakota Diasabra ultimo, SMAC a corona Aruba su Prins & Panchonan pa Carnaval 72.

  Tabatin en total 4 categoria pa Prins y Pancho e anochi aki.

   Aki DIARIO ta presenta resultado di eleccion di Prins y Pancho Adulto, y e tabata lo siguiente:

   E ganadornan a bira “Prins Lanta Para”, esta Jairo Maduro y “Pancho Boso Por Sinta”, Ivmar (Tyson)

Croes, representando Hepa Society.

   Por mira pues, cu Pastoor Jairo Maduro, ademas di tin fenomenal habilidad di canta den competencia di Soca di Carnaval, ta fenomenal tambe riba escenario pa Prins y Pancho.  Masha pabien.

   Segun Darren van Ommeren, Presidente di SMAC, e aña aki a opta haci e eleccion adelanta mirando cu e temporada di Carnaval ta uno mas cortico. Ademas, pa SMAC y su comisionnan organizatorio, e prioridad ta keda nos muchanan. Di e forma aki por garantisa cu eventonan unda mucha ta participa por tuma luga den fin di siman y cu esaki tampoco lo caba te den ora di marduga.

   Esaki ta di 4 aña caba bou direccion di Darren Van Ommeren cu SMAC ta haci e eleccion di Prins cu Pancho completamente gratis pa publico, specialmente pa encurasha nos comunidad pa forma parti di esaki y apoya tur partcipantenan pa sigui engrandece e actividad.

   “E apoyo di e actividad aki ta importante pues ta for di e escenario aki nos ta conoce mas comediante, mas MC y animador di evento den nos comunidad”, asina Presidente di SMAC a expresa. SMAC ta felicita tur participante di Prins y Pancho cu a aporta na Carnaval 72 y tambe nos monarcanan ganador.