Elaine Caminata ta lidera evento dedica na bos di mucha

ORANJESTAD (AAN): Diabierna atardi a tuma luga un evento den conexion di Dia di Mucha,

organisa pa Parlamento Hubenil (PH) bou di liderazgo di e hoben dinamico Elaine Caminata. Elaine, 15 aña, alumno di V4 di Colegio Arubano, ta un miembro activo di PH y recientemente a ser nombra Minister Hubenil di Derecho di Mucha y Labor.

   Como minister hubenil encarga cu derecho di mucha, Elaine a bisa den un entrevista cu DIARIO na ocasion di e evento, cu e evento tabata dirigi tanto na desaroyo personal como na inspira cambio positivo pa tur hoben na Aruba. Den cuadro di Articulo 12 di Nacionnan Uni, Parlamento Hubenil ta celebra e bos di tur mucha, y ta duna nan oportunidad pa expresa nan opinion cu dignidad y balentia.

   Articulo 12 ta recorda nos cu cada mucha tin bos, tin derecho, y tin balor. Nan palabra tin peso y sabiduria. Ora nos scucha, nos ta proteha nan dignidad; ora nos actua, nos ta crea un futuro mas husto, humano y compasivo pa tur nos muchanan.

   Elaine a subraya cu e exito di e evento ta producto di preparacion, dedicacion, planeamento structura, y e apoyo cu el a haya for di hopi hende. “Mi ta gradici señora Milvienne Dijkhoff y henter staf di Parlamento Hubenil, Directiva di Parlamento Hubenil, Minister y Parlamentarionan cu a asisti, y tur e hobennan cu a yuda mi, specialmente Parlamentario Hubenil Braydon Maduro. Y mi no por lubida mi mayornan, kendenan ta mi forsa y mi mayor apoyo,” asina Caminata a expresa cu orguyo.