J Balvin ta pidi disculpa pa su controversial videoclip

MEDELLIN: Awor cu e ola di critica for di rond mundo a cuminza cay mas pisa riba schouder di e reguetonero colombiano J Balvin,

basa riba un videoclip cu el a lanza dia 11 di October pa e cancion ‘Perra’, el a dicidi na duna su reaccion.

   E videoclip aki a mustra muhernan disfraza di cacho, haciendo bailenan sugestivo, cu hopi referencia sexual y tambe muhernan di color scur wanta cu cadena, y tambe letra manera ‘soy perra callejera con la popola de raza’.

   E avalancha di critica a bin di tur skina, hasta for di Vice President di Colombia, esta Marta Lucia Ramirez kende a rechaza e contenido di e videoclip pa su expresionnan sexista, racista, machista, y misogeno, ya cu nan ta atacha e derecho di muhernan door di compara nan cu un animal.

   El a haya critica tambe di Alba Mery, su mesun mama procedente di Medellin.  El a bisa cu casi e no por reconoce su yiu homber mas.  “¿Dónde está el josesito que yo conozco?”  E mama a bisa cu e no sa mes kico pa bisa di e cancion.

   Porfin riba Diadomingo atardi laat, J Balvin a kibra su silencio y a pone un video riba Instagram, den cual el a ofrece disculpa na publico femenino y na comunidad di hende di color.

   “Mi ta bin papia cu boso di e video di ‘Perra’, y prome mi kier ofrece mi disculpa na tur hende cu a sinti nan mes ofendi, specialmente e muhernan color scur.  Esey no ta forma parti di loke semper ami a expresa, semper di mi tabata tolerancia, amor y integracion, como tambe mi gusta apoya talentonan nobo, y den e caso aki Tokischa, un muher cu ta apoya su hendenan, su comunidad, y tambe ta duna poder na muhernan.”

   Despues e cantante a agrega, cu den forma di contesta y sigur pa respet, e mes a kita e videoclip como ocho dia pasa.  El a bisa awor e tey ta dunando su cara pa papia di e situacion.

   Na final el a pidi disculpa di su mama:  “Mama también discúlpame, la idea es seguir siendo mejor cada día, gracias por escucharme.”