Recomendacion pa e sigui un curso basico riba Aruba y Arubiano ---100 Mil Florin pa aña pa un studiante awe bay school cu el a bishita -- Kico a pasa cu e negoshinan na Merca di e representante di Aruba?
ORANJESTAD(AAN)- Aruba no ta comprende Miguel Jose Mansur of mester bisa cu ta Miguel Jose Mansur no ta comprende Aruba?
Un pregunta cu a bira sumamente importante, na momento cu Parlamento di Aruba tabata prepara pa bay trata e pakete di normanan pa un Ministro Arubano.
DIARIO semper a expresa e opinion cu mester bini un screening tambe pa Miembronan di Parlamento di Aruba, despues cu Gobernador a evita cu Benny Sevinger tabata tin mester di transport y seguridad special como prisonero, pa e por atende reunionnan di Parlamento.
Awe, sinembargo, nos kier dedica tur atencion na e topico sumamente interesante cu ta domina na Aruba, cu ta e representacion di Aruba den Parlamento pa medio di Miguel Jose Mansur.
E topico ta sumamente interesante pasobra manera ya a wordo bisa, aparentemente Miguel Jose no ta comprende Aruba y e Arubiano y e Arubiano no ta comprende Miguel Jose.
Den Parlamento ayera, Miguel Jose a lansa e sabiduria cu no ta nada special pa exigi pa tur Ministro a sigui Hoger Beroepsonderwijs, un estudio academico, pa e por bira Ministro di Aruba.
Miguel Jose no por a comprende e Presidente di Parlamento cu na su turno (mescos cu hopi hende) no por a comprende Miguel Jose, aunke Miguel Jose ta representa Aruba.
Increibel pero berdad, Miguel Jose ta lansa e thesis cu un comerciante, un experto den ofishi, enfin e gran mayoria di Aruba, no por bira Ministro pasobra nan no a sigui Hoger Beroepsopleiding, cu por compara cu Universitario pero pa HBO enfasis ta riba practica y pa Universitario riba ciencia.
Pa por comprende di kico Jose Miguel ta papia, DIARIO a dicidi pa bay investiga e schoolnan cu Miguel Jose a bishita.
Awe nos tin mas comprension pa e problema di Miguel Jose pa representa Pueblo di Aruba.
Miguel Jose lo tin problema pa defende e mucha y e hoben di Aruba cu mester bay un school den bario, pa despues busca ayudo di Gobierno pa bay studia den exterior pa asina por sigui mayoria di estudio pa haya e diploma di HBO pa bira Ministro.
Miguel Jose a bay International School of Aruba. Esaki tabata su preparacion pa drenta e “kostschool” un tipo di internaat, na Le Rosey, Suisa.
Ta trata aki di un school priva na Suisa cu a habri porta pa Miguel Jose bay un Universidad priva, Tufts na Merca.
Exclusividad ta splica aki pakico Miguel Jose por tin problema pa comprende e Arubano cu no tin Cien Mil Dollar anual pa bay school.
Cu hopi Arubiano, cu Miguel Jose ta presenta den Parlamento ta cera nan wowo pa soña cu 100 Mil Florin Arubano, lo ta dificil pa Miguel Jose comprende si sigui loke e ta pretende.
Si screen Miguel Jose, lo por topa cu e informacion cu el a studia Economia y Relacionnan Internacional na Tufts University, universidad priva, cu tur hende no por drenta.
Despues di a studia e “Hogere Beroepsopleiding” di Miguel Jose, pero pafor di bista di Aruba, nos por comprende cu su vision por ta mas dirigi riba otro planeta cu riba Aruba.
Kico Miguel Jose a haci cu su negoshinan na Merca no ta conoci y por keda su asunto si no bini Ley pa Screen tur Miembro di Parlamento tambe.
Hecho ta cu por considera Miguel Jose, algo “Hoger” cu normalidad na Aruba y aki nos no ta papia di su estatura.
Su caso sigur ta duna motibo pa un Encuesta Parlamentario pa dicidi, si un representante di Pueblo, pues un Parlamentario por ta mucho “hoog” pa un Pueblo. Ta keda e ora e pregunta si Pueblo por exigi pa un Representante cu ta mucho “Hoog” pa Pueblo pa sigui un curso pa por representa un Pueblo manera Aruba, di cual mayoria no a sigui Hoger Beroepsonderwijs y pesey den su screening ta papia mas bien di un “Hoger Moraal”!
Mester bisa cu nos a gosa di e bunita portretnan di e schoolnan cu el a bishita y cu nos ta comparti awe cu Aruba.
