ORANJESTAD (AAN)-- Minister di Turismo, Dangui Oduber, a splica den conferencia di prensa di Gobierno cu mirando e destinacionnan cu ta mustra e aumento mas grandi di capacidad di asiento,
cu e aerolineanan ta pone disponible pa Aruba, por observa cu e Mercado Mericano ta bay tin un aña record, den tur sentido, na 2022.
E mandatario a bisa cu, pa prome biaha, Aruba ta bay tin casi 1.2 miyon asiento disponible for di e mercado Mericano. Y otro mercado cu ta registra e capacidad di asiento hopi positivo ta e mercado Europeo. Minister Oduber a indica cu aki tambe por mira un incremento.
“Ta bay tin un aumento den e cantidad di asiento en comparacion cu 2019. Tur e proyeccionnan aki ta wordo haci compara cu aña 2019 pasobra esaki tabata un di e miho añanan pa turismo di Aruba, Triple A y pesey tambe, den tur e comparacionnan cu a wordo haci door di e Comision ta wordo referi y compara cu aña 2019”, e mandatario a subraya.
E titular di turismo a agrega cu loke ta hopi importante ta cu e di cuater cuartal e aña aki, ta bay mira con turismo ta bay crece enormemente. “Si nos mira e cantidad di asientonan mes cu ta bay tin disponible, den e di cuater cuartal den comparacion cu e di tres cuartal di aña 2021, e mercado Europeo ta bay conoce un incremento di 8% den cantidad di asiento disponible. Nos ta bay tin vuelonan adicional di KLM, cu ta cuminzando e invierno aki y nos ta mira cu tambe e vuelonan di Latinoamerica ta bay conoce un aumento di 15% den capacidad di asiento, Canada tambe ta bay bay conoce un incremento” e mandatario a señala.
E aumento den e cantidad di asientonan den vuelonan for di Merca ta di 4%. Asina e dignatario a splica, y ta bay tin casi 280 mil asiento di e mercado Mericano e invierno aki; vuelonan di Caribe Hulandes tambe lo aumenta y, finalmente, tur e otro regionnan hunto “rest of the world” tambe lo registra un subida di 6%. Asina e mandatario a splica.
Minister Oduber a agrega cu e asina yama “departing passengers” (pasaheronan di salida) cu ta bay sali for di aeropuerto pa aña 2022 tin dos escenario cu Triple-A ta sali for di dje: escenario conservative y escenario cautelosamente optimista.
“Den e escenario cautelosamente optimista nos ta mira cu tin mas pasahero cu ta bay sali for di Aruba, atrobe en comparacion cu 2019, y esaki ta ilustra cu e perspectiva ta cu 2022 ta bay bira un hopi bon aña pa turismo di Aruba. Nos ta mira esaki den e capacidad di asientonan cu, cuminzando e invierno aki nos ta bay mira e efectonan positivo caba pa nos turismo”, e dignatario a expresa.
{gallery}Na 2022, pa prome biaha, Aruba lo bay tin casi 1.2 miyon di asiento disponible for di Merca{/gallery}
