Ivan Quandus a lansa website pa musiconan local

ORANJESTAD (AAN): Siman cu a pasa, den sala di UNOCA, musico Ivan Quandus, a lansa oficialmente e website cu ta brinda un plataforma unico na mas cu 250 musico Arubano.

Cu e plataforma aki tur hende, na Aruba y rond mundo, cu ta desea di tin contacto cu un artista musico Arubano, por facilmente haci esaki bishitando e website www.arubamusician.com . Aki di cada musico cu a registra, e bishitante, por haya un biografia cortico dje artista acompaña su e number y email di contacto. Manera Ivan Quandus a menciona, claramente, cu e ta un oportunidad pa promove e artista musical di Aruba y no pa su persona gana placa cu esaki. E unico cu ta sali gana cu e plataforma aki, t’e artista di Aruba.

E categorianan cu publico por topa y bishita ta: News of the week, New music, For Sale, Entrevista y mas. E artista di Aruba por uza e plataforma pa bende su producto cu mundo tambe. Corda tambe cu e artista ta parti den e categoria di su musica presenta: instrumental, ranchera, tipico, bailabel y mas.

Ta invita un y tur pa bishita e website www.arubamusician.com  y comparti esaki cu cada artista musical di Aruba. A gradici UNOCA masha hopi y tambe sra. Maria Silva pa e sosten incondicional. Poco poco lo bay sigui amplia e website aki mas.