Diabierna y Diasabra venidero
ORANJESTAD (AAN): Gobierno di Aruba a anuncia oficialmente e di tres edicion di Cuida Aruba, cu lo tuma luga Diabierna 25 di September, y tambe Diasabra 26 di September, reenforsando e yamado na tur ciudadano pa tuma responsabilidad comparti den cuido y limpiesa di nos isla.
Durante un momento di prensa, Prome Minister Mike Eman a presenta e siguiente edicion di e iniciativa nacional hunto cu Crisis Management Office (CMO), CEDE Aruba, Departamento di Obra Publica (DOW), y Bureau City Inspector (BCI).
Den su introduccion, Prome Minister Eman a indica cu Cuida Aruba a mustra cu durante e dos prome edicion un esfuerso comun entre gobierno, sector priva, organizacion y boluntario por logra resultado concreto. Te awo, mas cu 600 ton di desperdicio a ser piki danki na e cooperacion amplio entre e instancianan publico y priva/
Pa e edicion di diasabra awor 26 di september, Gobierno a amplia e colaboracion cu organizacionnan comunitario y boluntario, cu lo brinda apoyo adicional na diferente punto unda lo tin diferente baki pa tira sushi di un manera gratis.
E seis puntonan unda por hiba sushi ta:
(*) San Nicolas: Veld di Trupial, otro banda di caminda dilanti Botica 4 Centro Medico.
(*) Santa Cruz: Stadion Nadi Croes-Crismo Angela.
(*) Tanki Leendert: Veld banda di Colegio Ora Ubao.
(*) Oranjestad: Centro di Bario Playa Pabao.
(*) Barcadera: Zona di Desperdicio na Ecotech.
(*) Pos Chikito: Veld di Baseball na Burubundo.
Ademas di brinda oportunidad pa tira desperdicio, Cuida Aruba ta sigui promove un cambio di mentalidad den nos comunidad. Gobierno ta enfatisa cu e iniciativa no ta limita solamente na limpiesa, sino cu ta busca fortalece sentido di responsabilidad comparti y solidaridad den barionan. E vision ta pa stimula ciudadano, famia, club, scol y organizacion pa cuida espacio publico, area deportivo, luga di recreaccion y tambe brinda un man na bisiña of residente cu por tin mester apoyo cu e trabaonan chikito di mantencion.
Mantene Aruba limpi ta contribui directamente na salud publico, specialmente den periodonan di awacero, ora desperdicio y recipiente cu ta acumula awa por aumenta riesgo di criadero di sangura.
Pa tur e motibonan aki ta haci yamado na comunidad pa sigui haci uzo di Zona di Desperdicio na Parkietenbos, cu ta habri shete dia pa siman, mientras e punto temporario di Cuida Aruba ta ofrece un oportunidad adicional pa participa den e accion nacional.
Gobierno di Aruba a expresa su gratitud na tur su partnernan, boluntarionan, empresa priva, medio di comunicacion y instancia cu ta sigui aporta na e iniciativa. Mantene Aruba limpi ta un responsabilidad di tur hende, y cu cada accion, con chikito cu e ta, por contribui na un isla mas bunita, mas saludabel y cu un mihor calidad di bida pa tur. Pa mas informacion subi www.cuidaaruba.com
