Inversion miyonario den expansion di RECIP-3 ta fortalece siguridad energetico

Fraccion Parlamentario di AVP:

ORANJESTAD (AAN): President di Parlamento Marlon Sneek y Parlamentarionan Jennifer Arends-Reyes y Clifford Heyliger, representando Fraccion di AVP, a participa na e acto oficial di entrega di e expansion di RECIP-3 na WEB Aruba NV. E proyecto importante aki ta representa un paso significativo pa fortalece confiabilidad y capacidad di Aruba su sistema energetico.

   Cu instalacion di dos motor nobo di Wärtsilä, RECIP-3 ta agrega 36 megawatt di capacidad firme na produccion di energia electrico di Aruba. E expansion ta necesario pa atende e demanda creciente di electricidad y reduci e riesgo di escasez of interupcion den suministro.

   Segun Fraccion di AVP, un suministro di energia confiabel ta un condicion esencial pa bienestar di nos famianan, funcionamento di scol y hospitalnan, continuidad di comercio y desaroyo sostenibel di Aruba su economia.

   “Energia confiabel no ta un luho. E ta un necesidad basico pa cada hogar y un condicion indispensabel pa nos turismo, comercio y servicionan publico por funciona debidamente. E expansion di 36 MW ta fortalece Aruba su capacidad pa responde na e demanda actual y prepara nos sistema energetico pa e añanan cu ta bin,” asina president di comision di energia, Clifford Heyliger a expresa.

   E necesidad pa aumenta e capacidad di produccion a bira mas urgente debi na e aumento den consumo, relaciona entre otro cu temperaturanan mas halto, crecemento di turismo, construccion di propiedadnan nobo y expansion residencial.

   Un otro aspecto importante di RECIP-3 ta e flexibilidad cu e motornan nobo ta ofrece pa combina produccion convencional cu mas energia renobabel. Produccion di energia solar y di biento ta varia dependiendo di condicionnan climatologico. P’esey, Aruba mester dispone di suficiente capacidad firme pa mantene e sistema stabiel y evita interupcion ora produccion renobabel ta baha.

   Pa Fraccion di AVP, no mester mira RECIP-3 como un reemplazo pa transicion energetico, sino como un base firme cu ta permiti Aruba integra mas energia solar, energia di biento y sistemanan di almacenamento den un forma responsabel y sigur.

   “Nos ta celebra e logro aki, pero e trabao mester continua. Aruba mester sigui inverti den energia limpi, baterianan, modernisacion di nos red y un trayectoria cla pa reduci dependencia di combustible fosil. Confiabilidad, sostenibilidad y un prijs pagabel pa consumidor mester bay man den man,” Parlamentario Jennifer Arends-Reyes a indica.

   Fraccion di AVP ta reconoce e esfuerzo y dedicacion di directiva y trahadornan di WEB Aruba, e profesionalnan di Wärtsilä, ingenieronan, contratistanan y tur persona cu a contribui na realizacion di e proyecto importante aki.

   Sneek, Arends-Reyes y Heyliger ta considera entrega di RECIP-3 un logro significativo pa infrastructura critico di Aruba y un muestra di loke por alcanza mediante bon planificacion, continuidad y cooperacion.

   Fraccion di AVP lo sigui sostene inversionnan responsabel cu ta fortalece siguridad energetico di Aruba. Na mes momento, Fraccion lo sigui cumpli cu su tarea di control pa percura pa eficiencia, transparencia y beneficio concreto pa pueblo di Aruba ta keda central den cada paso di nos desaroyo energetico.