Segun Jessica Irausquin di SKOA:
ORANJESTAD (AAN) – Director Interino di SKOA, señora Jessica Irausquin, den un entrevista reciente cu DIARIO, a splica cu actualmente no tin necesidad pa cera niun scol di SKOA. Sinembargo, escasez di maestro ta sigui representa un reto, no solamente na Aruba, sino tambe mundialmente.
Irausquin a duna di conoce cu ainda tin algun vacatura habri pa maestro, apesar cu SKOA a logra yena varios di e puestonan cu tabata disponibel.
Segun e Director Interino, e hecho cu actualmente tin menos mucha den algun nivel di enseñansa no ta nifica cu tin necesidad pa cera un scol. Al contrario, e cantidad actual di alumno ta permiti pa scolnan sigui funciona di forma stabiel.
“Aña pasa nos a cera algun klas den kleuterschool. E aña aki tabatin necesidad pa habri un klas extra, pero nos no a opta pa haci esaki, pasobra no tin maestro disponibel pa klasnan adicional,” Irausquin a splica.
Actualmente, segun e, scolnan di SKOA ta stabiel en cuanto cantidad di alumno. Segun e, prome aña di kleuter, scol basico y MAVO ta 99% yen, compara cu e maneho di Minister di Enseñansa cu ta indica cu mester tin un maximo di 24 mucha den un klas.
Irausquin a agrega cu e cantidad di mucha cu ta nace na Aruba a baha compara cu añanan anterior y cu proyeccionnan ta indica cu e tendencia aki por continua durante e proximo aña.
Pa e motibo ey, SKOA ta sigui monitorea e desaroyo demografico. Segun e cifranan di nacemento, den aproximadamente cuatro aña e organisacion lo mester evalua di nobo e situacion y determina cua paso ta necesario, conforme e vision di SKOA y e necesidadnan di enseñansa na e momento ey.
Pa awor, sinembargo, SKOA no ta mira necesidad pa cera scol y e prioridad ta keda mantene stabilidad, mientras cu nan ta sigui busca solucion pa e escasez di maestro.
