Segun Shanaya Cicilia di FCVR:
ORANJESTAD (AAN): Prome cu implementacion di e aplicacion nobo pa registra y maneha informacion di cada cliente, Fundacion Contra Violencia Relacional (FCVR) tawata procesa gran parti di su informacionnan manualmente.
Segun trahado social di e fundacion, Shanaya Cicilia, e metodo aki tawata trece cierto risiconan, specialmente relaciona cu proteccion y almacenamento sigur di datanan confidencial.
Cu introduccion di e aplicacion nobo, FCVR ta digitalisa y automatisa e registro di informacion esencial di cada cliente. Esaki ta inclui documentonan importante relaciona cu cada caso, manera e plan di siguridad di e persona afecta y su famia, e plan di accion cu ta un instrumento importante den e proceso di guia, pasobra e ta yuda cada cliente identifica pasonan concreto pa fortalece su situacion personal, aumenta su independencia y eventualmente sali for di e ciclo di violencia.
Segun e trahado social, e informacion cu ta wordo registra den e aplicacion tin tambe un funcion importante pa elabora e raportonan mensual di FCVR. E raportonan aki ta duna un bista concreto di e trabou cu e fundacion a realisa durante cada luna.
Entre otro tambe, e sistema ta permiti FCVR registra cuanto persona a ricibi guia y sosten, cuanto cliente a wordo referi na instancianan externo pa ricibi asistencia adicional, y cuanto referencia FCVR mes a ricibi di otro organisacionnan pa brinda asistencia.
Un otro aspecto importante di e aplicacion ta cu e ta permiti FCVR midi y presenta di forma mas cla e impacto di su trabou den comunidad. Esaki ta inclui e cantidad di iniciativa di informacion, educacion y empoderamento cu e fundacion ta organisa, como tambe e alcance y resultado di e diferente programanan cu FCVR ta implementa of tin pendiente pa ehecuta.
“Danki na e aplicacion, nos por registra y procesa tur e informacion aki di un manera mas structural. E ta un instrumento clave pa nos por refleha esaki den nos raportnan y, mas importante ainda, midi e impacto real di e trabou cu nos ta brinda na nos clientenan y den comunidad,” señora Cicilia a expresa.
