Interesante y bunita exposicion “Apasionada” di Yahaira Maduro den Cas di Cultura

ORANJESTAD (AAN) – E artista visual Yahaira Maduro, den fin di siman a presenta den Cas di Cultura, su di dos “Solo Exhibition”, titula “Apasionada”.

Un coleccion sumamente interesante y colorido, unda, den cada cuadro, e ta refleha un sentimento den forma di un curazon.

Den entrevista cu DIARIO, Yahaira ta yama e concepto aki “pop-up”, cu el a trece den e fin di siman pa presenta su coleccion pa aña 2022 cu ta consisti di pinturanan grandi y tambe coleccionable, cu ta pinturanan mas chikito. Yahaira a expresa cu pintamento ta su hobby, cual e ta haci banda di su trabao.

El a cuminza pinta desde cu e tabata un mucha, y cu el a pone un banda tempo cu e tabata studia. Yahaira a studia Ley y esey ta su trabao te ainda, eherciendo como hurista.

E ultimo diez añanan e ta pintando activamente y ta desaroya su mes, mas tanto den arte abstracto. Durante su exposicion el a trata di integra tur tipo di arte, manera poesia, musica y baile, locual a resulta den un exito grandi cu a haci e hoben artista, hopi contento.

E tabata un evento cortico, no pa bende su arte sino mas bien pa intercambia cu e publico cu amante di arte, cu a presenta pa aprecia su interesante y precioso coleccion.