E prome companianan di construccion ya a haya certificacion di Fundacion RCC

ORANJESTAD (AAN): Rob Timmes kende ta gerente di Business Improvement Croon Caribe, a haci entrega recien di certificado pa curso duna pa Fundacion RCC (Registracion di Companianan di Construccion).

   Esaki a tuma lugar den sala di reunion di ATIA.  E prome companianan cu a uni na Fundaccion RCC a participa den e curso. 

   Fundacion RCC a wordo funda pa reta companianan na Aruba pa demostra y mustra cu nan ta cumpliendo cu leynan local, pa mustra cu nan ta asumi responsabilidad, y percura cu hunto por percura pa un situacion economico husto na Aruba pa companianan di construccion, y henter e red di organizacionnan envolvi den construccion riba e isla.

   Ya caba e prome grupo di compania a participa na curso, y Fundacion RCC ta orguyoso y ta mira nan como pionero di ta esnan prome cu kier participa na e iniciativa y e plan tey caba pa na 2022 bay escala esaki aun mas, y reta mas compania pa nan bin haya sa pakico e Fundacion tey, y check si nan kier contribui na un economia husto na Aruba, pues nan ta sigui bay dilanti pa haci algo bunita di tur esaki.

   Segun Rob Timmers, e certificado cu e participantenan a ricibi ta hopi importante, pasobra mester pone un ‘comienzo’ na algo.  Aki a check e punto di bista na unda e necesidad ta mas cerca e organizacionnan riba e isla, cu ta trahando den sector di construccion, y a mira cu tin gran necesidad pa haya reconocemento como organizacion, cu loke bo ta haciendo ta algo husto y safe.

   Pues e ta bin realmente di loke nan ta haciendo, y cu e storia aki nan lo cana rumbo pa banconan, rumbo pa Gobierno, y rumbo pa Companianan di Aseguro cu e speranza cu nan tambe por mira cu lo por bay traha mihor hunto y danki na e Certificate di RCC nan por demostra cu nan ta companianan cu tey pa un trabao husto.

   Den 2022, Fundacion RCC lo bay traha mas pa e ‘construccion di comunidad’, pues nan lo bay busca mas contacto cu organizacionnan pa asina yuda nan brainstorm hunto.  Tambe den 2022 lo busca forma pa cumpli cu e speranza di loke algun organizacion a bisa di ta spera di nan, pues yuda RCC pa e bin mas riba mapa y asina demostra cu nan ta un organizacion responsable, y cu enberdad lo por mira un probecho di esey, y cu nan por confia den nan.

   Ademas di esaki, Fundacion RCC activamente lo sigui acerca demas companianan pa splica nan riba e meta, y pa busca forma pa nan afilia nan mes na nan.  Y cu e empuhe pa nan sigui e cursonan pa haya certificacion.