Atleta Paralimpico Elliott Loonstra a sali na di 5 lugar den e '9th World Para-Taekwondo Championship 2021'

ORANJESTAD (AAN):  Aruba Paralympic Committee a anuncia cu e atleta local Elliott Loonstra a logra sali na di 5 lugar of e di 29 atleta den e '9th World Para-Taekwondo Championship 2021' cual a tuma lugar na Turkia.

Ta asina cu dos aña pasa Elliott a sali na di 17 lugar den e mesun campeonato mundial aki.

Riba nan Facebook Page, Aruba Paralympic Committee a felicita Elliott Loonstra inmensamente pa e logro aki. Su progreso di dos aña pasa di 17 lugar pa awor di 5 lugar tambe ta un logro hopi grandi.

DIARIO tambe ta expresa palabranan di pabien na Elliott Loonstra, su coach Luciano Mazzeo, famia Loonstra y su team di support.

DIARIO a wak di cerca e esfuerso y avance di Elliott den tur e añanan aki y awe esaki ta e frutonan di su constancia.

Potretnan cortesia di  Aruba Paralympic Committee