Interesante apertura oficial di Simposio Dutch Caribbean Digital Heritage Week

Organiza pa Coleccion Aruba

 ORANJESTAD (AAN): E siman aki, Gobernador di Aruba Alfonso Boekhoudt hunto cu e.o. Ministro Endy Croes, Ministro Xiomara Maduro, y president di Parlamento Edgard Vrolijk, a asisti na e apertura Dutch Caribbean Digital Heritage Week cu a tuma luga den e ballroom di Aruba Marriott Resort & Stellaris Casino.

   Den cuadro di e cooperacion y colaboracion riba e tereno digital pa conecta nos herencia comparti den Caribe Hulandes, plataforma Coleccion Aruba a organiza e simposio aki. Tabatin diferente orador nacional y internacional entre otro, representante di Inter Archive di Merca, Netwerk Digitaal Erfgoed di Hulanda, Beeld en Geluid di Hulanda y orador di Curaçao y Aruba.

   Durante e simposio aki, a duna un presentacion di coleccion.aw, cual ta un medio pa keda interconecta y intercambia informacion di nos herencia cu Caribe Hulandes. Durante e ocasion aki, Coleccion Aruba a lansa nan website den un bachi completamente nobo.

   Minister Endy Croes ta felicita e Archivo Nacional y Biblioteca Nacional Aruba pa organiza e gran simposio aki y ta gradici nan pa cultiva Aruba su herencia cultural.