MEP lo sigui aumenta pension responsablemente

Lider di MEP Evelyn Wever Croes:

• A subi pensioen 4 biaha pa un total di 15% entre 2017-2024 

ORANJESTAD (AAN): Partido MEP ta un partido cu semper a pone nos adultonan mayor, nos pensionadonan na prome luga. Den un mundo di progreso, hopi biaha e sabiduria y e contribucion di esnan cu a construi nos pais, ta worde tira un banda pa gobiernonan.

   Sinembargo, Partido MEP semper ta keda firme, pasobra e grandesa di un sociedad no ta worde midi door di su avancenan, sino door di con e pais ta cuida di su adultonan mayor.

   E bienestar di nos ciudadanonan aki tin prioridad pa Partido MEP. Nos meta ta pa sigura e dignidad di nos pensionadonan, brindando nan siguridad y comodidad dentro di un maneho responsabel. For di aumento di placa di pension, cuido medico, y servicio social alcansabel, cada decision cu a worde tuma pa Partido MEP, ta basa riba e principio cu ningun pensionado, ningun adulto di edad avansa, mester sinti su mes abandona y laga atras.

   P’esey, Partido MEP no ta haci promesanan falso, pero ta traha na bienestar di esnan mas vulnerabel den nos pais. Apesar di tur crisis cu nos pais a enfrenta, desde cu Gabinete Wever-Croes a drenta gobierno, a subi pensioen 4 biaha pa un total di 15% entre 2017-2024. Ademas, Gobierno lo por subi e pensioen e aña aki atrobe. Y cada biaha cu MEP a hisa pension pa nos grandinan, MEP a haci esaki responsablemente. MEP a hisa reparatie toeslag di pensionadonan y a baha impuesto pa asina suavisa calidad di bida di nos ciudadanonan mayor.

   "Nos adultonan mayor ta e constructor y pilarnan di nos pais. Compromiso di Partido MEP den gobierno ta pa sirbi nos pueblo pa un miho futuro, sea cua sea ta bo edad. Partido MEP ta balora, respeta y brinda cuido y speranza na cada ciudadano y specialmente na nos adultonan mayor. Nos compromiso ta sigui pa no solamente nos aprecia nan, sino pa gradici nan pa e hecho cu nan ta e pilarnan riba cua nos sociedad awe ta para firme", Lider di MEP a enfatisa