Director di AZV, Edwin Jacobs:
ORANJESTAD (AAN)—Director di AZV, Edwin Jacobs, a menciona den entrevista cu DIARIO, cu AZV tin un rapport di luna di Maart 2019, cu ta resultado di un encuesta y un estudio di nivel, tocante docternan di cas.
Jacobs a señala cu desde e tempo ey a yega kehonan na AZV tocante e accesibilidad di docternan di cas pa traha afspraak, etc., pero e pandemia a bin aden y mester a atende cu ne di un otro forma.
“Pero aworaki, e cuido di prome liña tin completo atencion di parti di Ministerio pero tambe di parti di AZV. E maneho pa e proximo añanan ta e fortificacion di e prome liña, y esaki ta nifica cu nos mester amplia e cantidad di docternan di cas p’asina tin un poblacion di pashent menos grave, di 2.350 ta bayendo pa 2.100. Na di dos, nos ta amplia e sosten y apoyo pa e docter di cas mediante un POH. Aworaki e POH’s ta cabando nan ultimo module cu ta esun di envehecemento y di promocion di salud, y esey ta haci cu e POH ta bira completo, cu su cuater module. Ademas di asisti den Diabetes e ta bay sostene e docter di cas”, Ir. Jacobs a subraya.
“Pa 2026, cada docter di cas mester tin alomenos mitad dia pa siman, un sosten di un POH. Esaki ta yuda e docter cu pashent cu ta ripiti, cu cada biaha tin cu haci un test, pasobra e tin diabetes, problema cardiovascular y cu tin problemanan door di vehez. POH tin cu kita e man di e docter di pashent cu ta ripiti, p’asina pashentnan nobo por wordo mira”, Edwin Jacobs a señala.
Ademas di esey, AZV ta den combersacion cu Wit Gele Kruis pa e parti final, unda ta bay bin cu POH’s pa e parti di salud mental.
“E POH di salud mental ta bay yuda e docter tambe; prome cu un pashent bay pa HUNTO of Respaldo, ta bay wordo atendi pa un POH pa wak si kizas tin cosnan chikito cu por yuda e pashent eynan mes. Dus, nos ta ampliando e cantidad di docternan di cas pa 2026-2027 ampliando nan sosten pa asina ripiticionnan por wordo atendi door di dje”, Director di AZV a splica.
El a agrega cu banda di esey tin e parti di e app cu Minister ta e trekker di dje, pa bin cu e Aruba Health App cu tin cu duna un miho bista pa por duna citanan mas facil cu aworaki via telefon. Esey tambe ta bay yuda, Edwin Jacobs a remarca.
