Interes grandi di publico pa modelonan nobo di Chery

Showroom nobo habri na Sabana Blanco

ORANJESTAD (AAN): Ultimate Automobiles a organiza un evento special Diasabra na Sabana Blanco 35 pa presenta nan showroom nobo y modelonan di auto Chery.  Esaki ta un marca di auto di China, cu recientemente a uni e famia di Ultimate Automobiles, conhuntamente cu Suzuki y BYD.

      Gerencia di Ultimate Automobiles tabatin un anochi special prepara, unda nan a ricibi tur invitado cu man habri, sigui pa presentacion di historia di e marca.  Nan team di benta tabata cla pa duna tur hende un splicacion di interior y exterior di cada Chery eynan.  Tabatin ambiente hasta estilo di Carnaval e anochi aki.

  Diseña pa satisface e exigencianan unico riba camindanan di Caribe, Chery ta combina diseñonan ganador di premio cu durabilidad na nivel mundial.  Nan popular SUV di serie Tiggo, y tambe e fenomenal pickup Himla a acapara atencion di tur hende.