Camilo Mendoza, representante di Gobernacion di Santander:
ORANJETAD (AAN): Como parti di un mision comercial cu a tuma luga di 1 te 4 di juli, un delegacion di Departamento di Santander, Colombia, a presenta su oferta den turismo, servicio di salud y exportacion na representantenan di companianan di seguro, agencia di biahe y empresarionan di Aruba durante un encuentro na Savaneta Ballroom di JOIA Aruba by Iberostar.
Durante e presentacion, Camilo Mendoza, representante di Gobernacion di Santander, a bisa cu e mision tin como meta pa fortalece relacionnan comercial entre Santander y Aruba y crea oportunidadnan nobo di cooperacion.
Den e area di salud, Mendoza a destaca cu Santander tin dos di e principal hospitalnan specialisa di Colombia, cu ta ofrece servicio den cardiologia, cirugia cardiovascular, neurologia, neurocirugia, ortopedia, oftalmologia y cirugia di wowo. El a indica tambe cu ya tin convenio cu diferente compania di seguro di Aruba, loke ta facilita acceso di pacientnan Arubiano na e servicionan.
Un di e bentahanan principal pa Aruba ta e conexion aereo directo entre Aruba y Bucaramanga. For di 17 di juni, Wingo ta opera dos buelo semanal, riba diarason y diasabra, cu un tempo di biahe di aproximadamente un ora y dies minuut.
Segun Mendoza, e conexion nobo aki no solamente ta reduci e tempo di biahe, sino tambe ta habri oportunidadnan pa mas intercambio turistico, comercial y medico entre e dos destinacionnan.
E representante di Santander a destaca ademas cu tanto e costonan di e buelonan como e tratamentonan medico na Santander ta mas accesibel compara cu otro destinacionnan internacional manera Merca y Hulanda, convirtiendo Colombiano den un alternativa atractivo pa personanan cu ta busca atencion medico specialisa.
Durante e mision comercial, e delegacion di Santander lo sigui reuni cu diferente representantenan di sector priva na Aruba cu e meta di fortalece aliansa comercial y crea oportunidadnan nobo cu por beneficia e desaroyo economico di ambos region.
{gallery}Santander ta presenta su potencial na Aruba pa fortalece turismo, salud y comercio{/gallery}
