Inspectornan di salud a ricibi nan certificado den saneamento di barco

Minister Dangui Oduber

ORANJESTAD(AAN):  Diabierna anochi a tuma lugar e ceremonia final di e “Ship Sanitation Certificate” (SSC) na Surf Side Marina. Esaki tabata un conferencia cu Departamento di Salud Publico a organisa den nomber di gobierno di Aruba.

            Den e conferencia aki a participa e entrenadornan di Hulanda di e certificacion, inspectornan den salud publico como tambe representantenan di islanan BES, Curacao, Sint Maarten y Aruba mes.

            E proposito di e conferencia y curso tabata pa capacita e inspectornan den salud publico di region, siña den e aspecto practico con pa por realisa un inspeccion sanitario di barco. Cu e meta cu na final nan ta keda certifica y ricibi nan SSC.

            Cu e certificacion aki, e inspectornan di salud por haci saneamento riba e barconan crusero, tanker como tambe barco di carga. Esaki ta hopi importante pa proteha nos fronteranan di malesanan transmisibel indesea, COVID-19 a recorda henter mundo con importante saneamento ta.

            E conocimento y experencianan comparti pa yega na un certificacion ta demostra e compromiso cu tin den Reino pa keda progresa den cumplimento cu e reglanan internacional di salud (“International Health Regulations”). Esaki ta yuda nos fortalece salud publico y controla malesanan transmisibel den e region.

            Minister Oduber ta yama danki na e team di DVG y tambe na e team di Hulanda sr. Thijs Veenstra, sra. Tanja Hartog y henter e Cluster Milieu & Hygiëne. Un pabien na tur cu a ricibi nan certificado, nos fronteranan ta bay ta den bon man.