Stanley Heinze ta presenta su exposicion “Beyond Words”

Gran apertura ta 15 di October den Sala di UNOCA:

ORANJESTAD (AAN) – Fundacion Arte Pro Arte, a yama un conferencia di prensa, den cual tabata presente Robert Nieuw, Presidente di FARPA; Stanley Heinze, artista cu a presenta su Exposicion; Natusha Croes, artista; Rayenne Hernandez, Director di UNOCA y Amy Lasten, coordinador di FARPA.

            Natusha Croes a inicia e rueda di prensa, dunando su impresion tocante e Exposicion “Beyond Words” di Stanley Heinze.

            Croes a indica cu e ta considera su mes un colega, amiga, y kizas consehero, pero su funcion ta mas tanto como Obrero Cultural, pues, un persona cu kier mira arte contemporaneo, arte innovativo, crece y florece na Aruba.

            Natusha a comenta cu e tin  e grato placer di a traha mas cu cinco aña cu FARPA, y creando productonan innovativo pa Aruba, y stimulado e hobennan pa desaroya nan talento y puntonan di bista nobo cu por stimula idea y combersacionnan.

             “Beyond Words” mas cu imagen ta un constelacion di hopi palabra y hopi interpretacion.

Croes a expresa cu e exposicion aki ta laga bo no solamente ta den contacto cu e dia, dia, pero tambe cu e consenshi, sub-consenshi, sentimentonan, y ta hopi bunita pa wak con empodera Stanley ta, door di un simple foto-shop of un simple software cu e ta uza y di eynan drenta den un tipo di trance y genera imagennan sub-realista, y cu ta laga bo pensa riba un mundo unda imaginacion ta e compas principal.

            Un exposicion hopi enrikecedor pa nos comunidad, pa nos hobennan y pa tur nos generacionnan, por wak un producto hopi fresco, innovativo, crea digitalmente, y cu por yega na combersacionnan di alma pa alma.

            E gran apertura di e exposicion aki lo ta Diasabra 15 di October awo, pa 8’ordi anochi den Sala di UNOCA, unda Natusha ta e persona cu lo haci e presentacion, y e ta invita pueblo di Aruba pa bay wak, specula, combersa y conecta.