Demostrando e relacion estrecho entre KLM y Aruba Airport:
ORANJESTAD (AAN) – Aeropuerto Reina Beatrix, AAA ta relata cu den un relacion di casi 50 aña sigui entre Aruba Airport y KLM, esaki ta prome biaha cu ta scoge un cas antiguo di Aruba, como modelo pa e casnan miniatura di KLM. Ta motibo grandi pa celebra pasobra anualmente ta regala 850.000 cas n’e pasaheronan cu ta bula Business Class den vuelonan intercontinental di KLM.
Aeropuerto di Aruba ta contento cu, di e forma aki, ta honra e relacion cu Aruba y ta duna inicio na celebracion di 100 aña di aviacion na Aruba, cu ta core casi paralelo cu e celebracion di 103 aña di existencia di KLM.
E casnan miniatura di KLM:
Desde aña 1952 a cuminsa regala “KLM Blue Delft Miniature Houses” na pasaheronan cu ta bula den Business-Class cu e aerolinea Hulandes. Originalmente e casnan aki ta como honor na e casnanantiguobanda di e canalnan den Amsterdam. Cada pasa tanto tempo sa scoge un otro cas historico di Hulanda. Den e cas tin Bols Genever. Te cu awo, ta existi cas 1 te 102 y desde awe, cas 103 ta disponibel, como cas Ecury di Aruba!
AAA: Pabien KLM!
“Nos ta honra di ta co-anfitrion pa desvelo di e cas number 103 di Delft Blue House di KLM”, asina Joost Meijs, CEO di Aruba Airport a bisa den su discurso durante e evento pa celebra e di 103 aniversario di e compania di Hulanda. KLM a organiza un celebracion, hunto cu Aruba Airport Authority, Aruba Tourism Authority y Stichting Monumenten Fonds Aruba, den centro di ciudad, dilanti un monumento cu awor lo bira cas modelo riba tur vuelo di KLM, den nan seccion di Business Class.
Canando e trayecto sostenible
“Nos lo sigui desaroya y duna forma na futuro di nos aviacion, usando lo ultimo den tecnologia moderno. Nos lo sigui e caminda di esfuerzo sostenible, no solamente den operacion di avion di coriente entre e islanan, pero tambe den realiza henter nos operacion na aeropuerto den esun mas sostenibel den nos region, den e añanan nos dilanti. Lo ofrece operacion di aeropuerto sigur pa e futuro generacionnan. Nos a cuminza encamina varios trayecto di sostenibilidad, logrando diferente certificacion di sostenibilidad den industria di aviacion. Nos ambicion no ta solamente un soño, pero cu lo bira un realidad den e añanan nos dilanti”, di acuerdo cu Joost Meijs.
E director di Aruba Airport Authority tabata masha orguyoso di anuncia mesora cu “Nos celebracion di cien aña di aviacion na Aruba otro aña, no por a cuminsa miho, cu e regalo aki di KLM, añadiendo un cas miniatura di Aruba den nan coleccion. Nos ta hopi contento cu e escogencia di KLM pa uza e cas di famia Ecury como un di nos patrimonionan nacional. E cas aki lo duna un sabor Rubiano na e coleccion grandi di casnan miniatura di KLM, pero tambe pa promove y proteha nos patrimonio cultural y como un aporte na cultura y desaroyo sostenible pa nos isla”.
“Pa nos di Aruba Airport, e celebracion aki ta bin na un bon momento pasobra nos ta den alcanza un logro impresionante; 100 aña di aviacion na Aruba! Pa ta exacto, dia 18 di Augustus 2023, Aruba ta recorda cu cien aña pasa e prome avion a baha na Aruba, pa colmo un KLM. Desde e dia ey aviacion a transforma e futuro di Aruba y KLM a hunga y ta hungando un rol importante den esey”.
E cas historico
E biaha aki KLM a scoge cas di famia Ecury a Aruba, como nan cas number 103. Ta trata aki di un cas cu ta pertenece na Museo Arkeologico di Aruba. Ta bon pa bisa, cu e cas aki ta situa cerca di unda e prome avion a baha na Aruba casi 100 aña pasa, esta den waf di Paardenbaai.
For di e cas aki, nan yiu Nicasio “Dundun” Ecury a forma su imperio di negoshi. Su yiu Boy Ecury a bay studia na Hulanda y a bira un heroe di guera, ora a fusil’e na 1944. Desde aña 2009 a haci e cas parti di Museo Arkeologico di Aruba. E cas mes ta di aña 1929 cu varios elemento y panorama clasico y Caribense. E arkitecto tabata Dada Picus, a crea, den un forma unico y statico, un compleho harmonioso.
Relacion largo entre KLM y Aruba
E avion KLM-Fokker F.XVIII di tres motor, conoci bou di e nomber “Snip” a bula pa Corsou, pa prome biaha na December 1934. El a dura shete dia pa yega, saliendo for di Amsterdam pa Marseille, Alicante, Casablanca, Porto Praia, Paramaribo (Surinam), La Guaira y finalmente yegando Corsou.
E prome vuelo transatlantico aki di KLM tabata posibel tecnicamente, solamente door di haci varios escala. Dia 23 di December 1934, Snip a haci su prome “touch down” na Aruba. Dia 19 di Januari 1935 a start cu vuelo regular entre Corsou y Aruba, bou di e nomber di KLM West-IndischBedrijf (WIB). Dia 11 di februari 1974, a start cu un vuelo regular y direct entre Hulanda y Aruba, cu awendia ta yega diariamente riba nos isla.
Cien aña di aviacion na Aruba
Otro aña ta celebra 100 aña di aviacion riba Aruba. Door di trabou duro di Aruba Airport Authority, a logra pa den e ultimo cien añanan, ta conecta nos isla cu hopi destinacion rond mundo. Cu e vision y maneho aki, a logra desaroya economia di Aruba den un di esunnan di mas fuerte y resiliente den Caribe. Ta bon pa menciona cu KLM a hunga un rol importante den e ultimo cien añanan di aviacion na Aruba.
Durante e siguiente lunanan, Aruba Airport lo duna mas forma na e celebracion di 100 aña di aviacion, cu ta tuma lugar durante henter aña 2023.
